霸戲哥之日常#324｜ 黑腳

第40屆香港電影金像獎曲終人散，有人歡喜有人愁，終極大贏家一定係林家棟，全程為抱恙嘅四哥護航，得體得嚟又保全到老人家顏面，贏得一致好評。至於大輸家呢，就肯定係六度提名最佳男主角都食白果嘅吳鎮宇。

要數金像獎「黑腳」，女就唔使問一定係Sammi，男嘅睇怕都係吳鎮宇。吳鎮宇先後拎過金馬影帝（《鎗火》）、香港電影評論學會最佳男演員（《旺角揸fit人》、《爆裂刑警》、《公元2000》），演技好早已係公認，唯獨香港電影金像獎仲未開齋，就連豬視妹都覺得好錯愕。

今屆幾齣得獎電影，霸戲哥全部睇過，平心而論，吳鎮宇喺《濁水漂流》嘅表現，又的確係好過四哥喺《殺出個黃昏》。但如果真係要計到盡，霸戲哥反而覺得林家棟喺《智齒》先最值得攞影帝。

回顧吳鎮宇六次提名金像獎最佳男主角——《爆裂刑警》、《朱麗葉與梁山伯》、《無間道II》、《脫皮爸爸》、《逆流大叔》同《濁水漂流》，霸戲哥最鍾意係佢演《逆流大叔》，只可惜同屆撞正近乎無敵姿態橫掃頒獎禮嘅《淪落人》秋生，輸都係冇話可說囉。

所以霸戲哥幾時都話，攞獎嘅嘢，時勢同運氣先係最重要。

霸戲哥

** 博客文章文責自負,不代表本公司立場 **

呢個星期最威係我偶像阿Sa，一連有兩套擔正嘅電影上映，分別係《神探大戰》同埋《給我1天》。由邱禮濤監製、李敏編導嘅《給我1天》，原本喺2022年2月22號上映，可惜疫情關係一改再改，終於喺今個月23號上映，而Disney+亦喺同日晚9:30獨家串流上線。

套戲講述王祖藍飾演患「漸凍人症」嘅畫家，想喺病情惡化前向阿Sa飾演嘅小學同學表白。王祖藍做咗無綫創意官之後，大家似乎忘記咗佢嘅演員身份，呢套戲正好remind番大家佢其實係演技派。至於阿Sa就唔使講啦，拍愛情催淚戲可以話係手到拿來。

漸凍人症，又名肌萎縮性脊髓側索硬化症（Amyotrophic lateral sclerosis，ALS），係一種漸進嘅神經退行性疾病。由於上、下運動神經元退化，導致身體肌肉萎縮，患者最終喪失控制自主運動嘅能力。當年有人喺社交媒體發起冰桶挑戰（Ice Bucket Challenge），令更多人深入了解呢種罕見疾病。而呢個Challenge，相信係歷年咁多個Challenge之中最有意義嘅一個。

唔知阿Sa呢套《給我1天》，又能唔能夠令更多人認識ALS？