霸戲哥之日常#327｜ 說好的寶藏呢

之前傳咗好耐話出又未出嘅《驚天奪寶》系列影視作品，終於有眉目啦。遺憾係，呢套並唔係傳說中嘅《驚天奪寶3》，而只不過係10集嘅電視劇，英文名都定埋，叫《National Treasure: Edge of History》，「即將」喺Disney+上架。

監製Jerry Bruckheimer早排放風話搵Nicolas Cage傾新project，仲吹到會成事，搞到Cage迷如霸戲哥鬼咁雀躍。結果當然係希望越大失望越大啦，鬼佬講嘢真係信唔過，尤其越大粒嗰啲。

冇NIc Cage嘅《驚天奪寶》，仲算唔算係驚天奪寶呢？明明佢先至係寶嘛。至於女主角Diane Kruger都冇份，今集女主角係Lisette Alexis，故事講佢因為要追尋家族嘅歷史，決定前往探險。而之前喺《驚天奪寶》演出過嘅Justin Bartha同Harvey Keitel都會回鍋客串，等觀眾有返啲集體回憶咁啦。

有口痕友話好彩套劇唔係Netflix劇，唔係就多數淪為垃圾。霸戲哥心諗有分別咩⋯⋯

霸戲哥

** 博客文章文責自負,不代表本公司立場 **

還好馬季煞科，英超又未開鑼，可以等霸戲哥荷包休養生息，當然係為咗來季走更長遠嘅路啦。

霸戲哥好賭，可惜天生冇乜橫財運，唔似得豬視妹咁叻，試過喺馬會度拎住張cheque大搖大擺咁行出門口。正所謂一命二運三風水，贏唔到錢就只能怪霸戲爸媽生得自己咁樣衰。

今集J2節目《開壇》，有蘇民峰師傅用面相同掌紋嚟講解財運。原來一個人嘅鼻相，係可以斷定正財同偏財運。而最差嘅鼻相係高低鼻孔同大小不平，呢個係「逢賭必輸」格。咦，咁咪可以好似「地獄黑仔王」張家輝咁當燈用？

蘇師傅話除咗個鼻，手掌嘅財運線都睇到一個人有冇偏財運，如果無名指對落有「米」字紋或星紋，中六合彩機會比一般人高喎。

霸戲哥一望自己隻掌，乜紋都冇，睇嚟呢個月都要努力搵錢，留返下個月貢獻畀馬會嘞。