霸戲哥之日常#330｜ 香港金曲頒獎典禮

同豬視妹傾開，先發現我有段時間冇睇樂壇頒獎禮，今年香港電台同TVB破天荒合辦《香港金曲頒獎典禮》，話晒第一屆，都想睇吓搞成點。

一開場都算有驚喜，劉德華打頭陣帶住班後輩歌手唱《如果有一天》，歌詞「只要食得落睡得好天天裏笑得開口」咪就係霸戲哥、豬視妹同大爺雞嘅生活態度同寫照，聽到有啲想落街買支道地綠茶隊添。

雖然話係頒獎禮，但似歌手表演騷多啲，好多獎都估到邊個攞，冇乜驚喜。受TVB力捧嘅炎明熹同姚焯菲，理所當然袋唔少獎，佢兩個呢一年極速成長，點睇都唔似十幾歲。相映成趣嘅係，今晚仲見到好多喺樂壇浮沉多年嘅前輩，一樣冇放棄嘅音樂，佢哋嘅堅持，其實仲令人鼓舞。

至於奪男新人金獎嘅曾比特，亮相完《聲生不息》升呢，好在佢都冇忘本，不停答謝恩師Eric Kwok，仲唱埋Swing首首本名曲《1984》，呢首係霸戲哥讀U時嘅「飲歌」嚟架，打天九嗰陣不停咁loop。

頒獎禮當然有美中不足嘅地方，譬如現場收音呀，成日翻唱舊歌呀咁。不過霸戲哥最想睇到改善嘅，係無論歌手、歌迷、抑或電視台都好，都放下成見，一齊為香港樂壇努力。只有咁樣，先至可以稱得上真正嘅「香港金曲頒獎典禮」。

霸戲哥

** 博客文章文責自負,不代表本公司立場 **

唔知大家仲有冇印象，上年約莫呢個時間，張繼聰同袁澧林拍咗套戲叫《窄路微塵》。套戲喺香港暫時未有映期，但最新收到消息，就係已經入圍「第75屆愛丁堡國際電影節」嘅「Heartbreakers」單元，亦係唯一獲邀參展嘅香港電影，認真威威。

《窄路微塵》由「新晉」導演林森執導，其實佢一啲都唔新啦，喺香港演藝學院電影電視學院導演系畢業之後，拍咗唔少社會議題為主嘅作品，好似《人在皇后》、《夜以作日》同《暉仔》咁，亦係鮮浪潮常客。《窄路微塵》係佢贏咗「 mm2新晉導演計劃」，繼而獲得長片合約。據悉電影以受疫情影響嘅香港為背景，講述人活喺陰影之下同光之間嘅故事，睇海報見到張繼聰同袁澧林，成套防護裝備出現，狹窄空間入面密不套風，有種好繃緊嘅感覺。相信套戲都會隱藏唔少訊息。

mm2近年除咗做電影發行，亦參與唔少電影製作，好似《救殭清道夫》、《一秒拳王》同《濁水漂流》咁，都帶住濃厚嘅本土色彩。

套戲入圍愛丁堡電影節，最開心應該都係移居英國嘅香港人，可以借睇戲嚟緬懷喺香港嘅時光。