霸戲哥之日常#332｜ 灰影人

Netflix久唔久就會推套大片出嚟益吓觀眾，提醒大家財力雄厚有錢可燒。最新一齣A級大片叫《灰影人》（The Gray Man），由羅素兄弟主理，Ryan Gosling、Chris Evans搭住兩位上位靚女Ana de Armas同Jessica Henwick四條煙主演，唔睇得都嚇得啦，斷估。

電影係改編自同名小說，其實同一般諜戰片無異，講述Ryan Gosling飾演嘅殺人犯（隊冧自己老竇），獲CIA聘請訓練成殺人特工，一次執行任務時發現局中有局，接連係不停被人追殺。劇情娘到冇嘢好講。

為咗彌補劇情嘅空洞，惟有係動作設計同鏡頭調度度搞多啲花臣。成齣戲真係由頭打到尾，無論係埋身肉搏嘅巷戰、槍戰、飛車追逐戰、甚至喺三萬呎高空嘅機艙大戰，都睇到人熱血沸騰。鏡頭嘅運用亦係教材級數，睇到出係揼本之作。不過唔知大家有冇覺得Ryan Gosling個樣好似英格蘭球星Harry Kane？睇佢同敵人撕殺，就會聯想到Harry Kane踢波時個樣，係有啲格格不入。

估唔到荷李活都有極度唔合邏輯嘅爽片，《灰影人》嘅觀影感覺就好似《叛諜追擊》crossover《殺神》，主角Ryan Gosling嘅人設係無限血加不死身，而佢身邊人就相反全部豆腐做，一碰就死。

霸戲哥

** 博客文章文責自負,不代表本公司立場 **

霸戲哥係港島人（東區），荃灣對我嚟講，已經喺惡搞歌《當荃灣愛上柴灣》寫晒，正是「由柴灣返番荃灣終站，我瞓到忘記何站」。但公公以前安葬喺荃灣華人永遠墳場，每年春秋二祭，霸戲哥都要搭死亡地鐵，由港島東縱橫到新界西再折返，認真噩夢。

後來識咗豬視妹，多咗去荃灣食飯睇戲，先慢慢真正認識荃灣，同開始記得一堆商場嘅名字。但到今時今日，仍然冇法理解荃灣嘅城市規劃到底搞乜，點解要整咁多條行人天橋。

今集J2嘅《關注關注組》，咁啱就係討論呢個「天橋之城」。十郎鄧梓峰嘗試解釋荃灣瘋狂起天橋之謎，話如果地面道路太擠塞，起行人天橋嚟疏導交通都無可厚非。不過，霸戲哥就咁睇，就係以前嘅urban planning做得太差，啲工廠起到岩岩巉巉東一忽西一忽，先搞到啲交通咁混亂。其實urban planning係可持續發展（sustainable development）好重要嘅一環，若然一味靠駁天橋嚟解決道路問題，始終都係治標唔治本。

不過咁多條天橋都有度好，就係落雨唔怕濕身啦。