霸戲哥之日常#322｜ J2監察站(21)：天橋之城

霸戲哥係港島人（東區），荃灣對我嚟講，已經喺惡搞歌《當荃灣愛上柴灣》寫晒，正是「由柴灣返番荃灣終站，我瞓到忘記何站」。但公公以前安葬喺荃灣華人永遠墳場，每年春秋二祭，霸戲哥都要搭死亡地鐵，由港島東縱橫到新界西再折返，認真噩夢。

後來識咗豬視妹，多咗去荃灣食飯睇戲，先慢慢真正認識荃灣，同開始記得一堆商場嘅名字。但到今時今日，仍然冇法理解荃灣嘅城市規劃到底搞乜，點解要整咁多條行人天橋。

今集J2嘅《關注關注組》，咁啱就係討論呢個「天橋之城」。十郎鄧梓峰嘗試解釋荃灣瘋狂起天橋之謎，話如果地面道路太擠塞，起行人天橋嚟疏導交通都無可厚非。不過，霸戲哥就咁睇，就係以前嘅urban planning做得太差，啲工廠起到岩岩巉巉東一忽西一忽，先搞到啲交通咁混亂。其實urban planning係可持續發展（sustainable development）好重要嘅一環，若然一味靠駁天橋嚟解決道路問題，始終都係治標唔治本。

不過咁多條天橋都有度好，就係落雨唔怕濕身啦。

霸戲哥

** 博客文章文責自負,不代表本公司立場 **

朋友短訊告知，位於油麻地嘅美都餐室宣佈結業。呢次都唔知第幾次傳出餐室執笠嘅消息，就好似你樓下轉角位總有間賣雜貨嘅地舖，一年365日都寫住執笠清貨但照常營業一樣。

霸戲哥當然知道美都嘅歷史。餐室喺1950年開業，無論係門外嘅大型霓虹燈招牌、店內嘅格仔瓷磚牆身、用鐵枝砌成嘅窗框，抑或木製嘅舊式卡位，都保留住港式冰室嘅獨有風味，成為電影取景熱點係非常之合理。

不過霸戲哥都只係喺電影度見識過美都嘅裝潢，每次踢波經過呢度，始終都無緣入去幫襯。點解？原諒霸戲哥就係咁膚淺，寧願相信網上嘅食評，都唔想以身試伏⋯⋯

Anyway，任何餐廳都有佢嘅忠粉，聽聞美都出名係焗排骨飯同蓮子紅豆冰。呢啲咁花工夫又唔賣錢嘅食物，依家啲連鎖茶餐廳唔會有得食咯。

但正如最老套嗰句，天下無不散之筵席。話唔定有一日，喺你樓下轉角位間地舖，突然又開番間美都餐室呢！