霸戲哥之日常#332｜ 灰影人

Netflix久唔久就會推套大片出嚟益吓觀眾，提醒大家財力雄厚有錢可燒。最新一齣A級大片叫《灰影人》（The Gray Man），由羅素兄弟主理，Ryan Gosling、Chris Evans搭住兩位上位靚女Ana de Armas同Jessica Henwick四條煙主演，唔睇得都嚇得啦，斷估。

電影係改編自同名小說，其實同一般諜戰片無異，講述Ryan Gosling飾演嘅殺人犯（隊冧自己老竇），獲CIA聘請訓練成殺人特工，一次執行任務時發現局中有局，接連係不停被人追殺。劇情娘到冇嘢好講。

為咗彌補劇情嘅空洞，惟有係動作設計同鏡頭調度度搞多啲花臣。成齣戲真係由頭打到尾，無論係埋身肉搏嘅巷戰、槍戰、飛車追逐戰、甚至喺三萬呎高空嘅機艙大戰，都睇到人熱血沸騰。鏡頭嘅運用亦係教材級數，睇到出係揼本之作。不過唔知大家有冇覺得Ryan Gosling個樣好似英格蘭球星Harry Kane？睇佢同敵人撕殺，就會聯想到Harry Kane踢波時個樣，係有啲格格不入。

估唔到荷李活都有極度唔合邏輯嘅爽片，《灰影人》嘅觀影感覺就好似《叛諜追擊》crossover《殺神》，主角Ryan Gosling嘅人設係無限血加不死身，而佢身邊人就相反全部豆腐做，一碰就死。

霸戲哥

** 博客文章文責自負,不代表本公司立場 **

霸戲哥自問硬頸固執，遇到唔公平嘅事會咬住唔放，去到天腳底都要討回公道。如果呢個世界有死心不息大賽，我絕對有信心出戰，只係點都唔會贏到梅啟明。

呢位「梅媽的神奇小子」，多年來對爭奪細妹梅艷芳嘅遺產不遺餘力，鍥而不捨嘅精神無人能及，佢嘅爭產偉業亦廣頌全球。

最新一單「傑作」，係佢睇見《梅艷芳》票房收得，拿拿聲入稟話電影《梅艷芳》侵犯商標，實行斬番幾兩唔執輸。案件今日喺高等法院審理，辯方指原告註冊嘅兩個商標，只涉珠寶同手錶一類，同電影無關，而梅啟明申請嘅另一項商標，包括出版，係未獲批。法官最終批准電影公司剔除梅啟明嘅訴訟，仲要神奇小子支付訟費添。今次真係偷雞唔到蝕渣米囉。

但正所謂清官能審家庭事，或者梅啟明心裏面真係有莫大冤屈，非要訴諸法律不可。問題係，究竟梅啟明嘅信念要有幾強大，先可以冒住畀全世界恥笑嘅風險，都要使錢打官司討回「公道」？話時話，佢又要提出上訴嘞。

只可以話，香港真係充滿傳奇。梅家一門幾傑，只係各走極端而已。