博客文章
霸戲哥原本睇緊場東亞錦標賽日本對韓國，豬視妹突然話要轉台睇《東張西望》，話今晚有賤男part2睇。
原來呢兩日好多人討論呢位中佬賤男，據「苦主」稱，中佬透過社交平台炫富，再用交友app識女食女，同時間一腳踏幾船，又食又拎之餘仲靜靜雞拍埋淫片添！後來中佬被苦主揭發欺騙感情呃飲呃食，仲要係冇錢兼住公屋嘅，就組成「復仇者聯盟」，夾埋《東張》一齊設局捕佢。成個佈局都幾有張力嘅。
呢啲感情糾紛誰是誰非，霸戲哥真係唔多評論啦，只可以講，依家網上有咁多視頻教你提防畀人「呃蝦條」，淨係Netflix最近已經有部《Tinder詐騙王》，點解仲可以咁天真咁儍畀人有機可乘？
雖然節目將賤男打晒厚格，但全能嘅連登仔，好似已經起咗底，仲有個fb專頁添，大家無聊又想食花生嘅可以留意吓。
霸戲哥
** 博客文章文責自負,不代表本公司立場 **
霸戲哥係港島人（東區），荃灣對我嚟講，已經喺惡搞歌《當荃灣愛上柴灣》寫晒，正是「由柴灣返番荃灣終站，我瞓到忘記何站」。但公公以前安葬喺荃灣華人永遠墳場，每年春秋二祭，霸戲哥都要搭死亡地鐵，由港島東縱橫到新界西再折返，認真噩夢。
後來識咗豬視妹，多咗去荃灣食飯睇戲，先慢慢真正認識荃灣，同開始記得一堆商場嘅名字。但到今時今日，仍然冇法理解荃灣嘅城市規劃到底搞乜，點解要整咁多條行人天橋。
今集J2嘅《關注關注組》，咁啱就係討論呢個「天橋之城」。十郎鄧梓峰嘗試解釋荃灣瘋狂起天橋之謎，話如果地面道路太擠塞，起行人天橋嚟疏導交通都無可厚非。不過，霸戲哥就咁睇，就係以前嘅urban planning做得太差，啲工廠起到岩岩巉巉東一忽西一忽，先搞到啲交通咁混亂。其實urban planning係可持續發展（sustainable development）好重要嘅一環，若然一味靠駁天橋嚟解決道路問題，始終都係治標唔治本。
不過咁多條天橋都有度好，就係落雨唔怕濕身啦。
