霸戲哥原本睇緊場東亞錦標賽日本對韓國，豬視妹突然話要轉台睇《東張西望》，話今晚有賤男part2睇。
原來呢兩日好多人討論呢位中佬賤男，據「苦主」稱，中佬透過社交平台炫富，再用交友app識女食女，同時間一腳踏幾船，又食又拎之餘仲靜靜雞拍埋淫片添！後來中佬被苦主揭發欺騙感情呃飲呃食，仲要係冇錢兼住公屋嘅，就組成「復仇者聯盟」，夾埋《東張》一齊設局捕佢。成個佈局都幾有張力嘅。
呢啲感情糾紛誰是誰非，霸戲哥真係唔多評論啦，只可以講，依家網上有咁多視頻教你提防畀人「呃蝦條」，淨係Netflix最近已經有部《Tinder詐騙王》，點解仲可以咁天真咁儍畀人有機可乘？
雖然節目將賤男打晒厚格，但全能嘅連登仔，好似已經起咗底，仲有個fb專頁添，大家無聊又想食花生嘅可以留意吓。
霸戲哥
** 博客文章文責自負,不代表本公司立場 **