霸戲哥之日常#337｜ 奸角萬歲

以往嘅TVB劇大結局，多數都係豬視妹霸住要睇，好少係霸戲哥調番轉頭溫馨提示佢。所以商戰劇《回歸》算係近年比較高質嘅TVB劇，監製林志華同編審張世昌有料到。

以往TVB劇去到結局篇，通常劇情都已經呼之欲出，角色要死的死，final boss都揭晒盅。但《回歸》去到今晚最後一集，仍然未知「粵德居」嘅生死，祖哥同娟姐會否老套地大團圓復合，家健家謙兩兄弟又會否攜手幫忙經營粵德居嘅brand building同marketing，兼各自有心儀伴侶喺身邊，都要等今晚揭曉。

咁多角色之中，霸戲哥比較欣賞徐榮飾演嘅馬志圖。又咁講，成齣劇，如果冇呢個咁乞人憎嘅角色，就唔會有咁大嘅張力。但呢啲咁仆街嘅角色，一般演員都唔想演，因為太容易被定型，所以徐榮今次真係抵讚，可以話係一人孭起成套劇。

霸戲哥

** 博客文章文責自負,不代表本公司立場 **

冇冇人記得你對上睇嘅一套越南電影係邊套？會唔會係《三輪車伕》？香港人對越南電影嘅認知的確比較少，喺國際電影節放映嘅係有，但能夠變成主流賣座嘅又真係諗唔到。

聽日係農曆七月，鬼門關大開，豬視妹已急不及待要霸戲哥買飛睇鬼片。咁啱有套越南鬼片《鬼咒》上映，睇嚟呢個禮拜都走唔甩。之前喺Netflix睇《咒》，已經嚇到半死，呢劑要入戲院「硬食」，觀感又係另一層次。

《鬼咒》取材自越南嘅靈異都市傳說，好似「蔗汁海報女郎」、「馬戲團魔術師」、「通靈女孩」，三段故仔，三種嚇人伎倆，令觀眾了解更多越南神秘風俗、儀式同習俗。

聽聞《鬼咒》導演陳友進係港產鬼片fans，唔知套戲入面有幾多港式鬼片元素呢？或者等霸戲哥驚完，再同大家分享啦。