霸戲哥之日常#345｜ 繼續呼吸

霸戲哥以前好鍾意聽Ingrid Michaelson首《Keep Breathing》，每遇到生活上嘅困難，都會同自己講，只要仲有一口氣，一切問題都可迎刃而解。

只係，人生係會不停遇到重擊，亦唔係吓吓都避到。有人只要講一句說話，就可以夾生將你整到半死。夠屈機吧？

Netflix最近有齣新劇上架，就係叫《Keep Breathing》。故事講述Melissa Barrera飾演嘅傲慢女律師Liv，遇上空難流落森山。一開始睇，又以為係一般野外求生劇集，啲橋Tom Hanks套《Cast Away》都睇晒啦，但原來野外求生只係佔小部份，Liv透過喺荒島獨處，重整佢混亂不堪嘅人生先係主菜。

雖然外界對套劇評分一般，但霸戲哥幾鍾意佢嘅敍事方式。人生正正就係好似獨處荒島咁，不斷遇到難關，最後就只有自己去面對同承擔。

霸戲哥

** 博客文章文責自負,不代表本公司立場 **

早幾日霸戲哥經過大埔超級城，見到人頭湧湧先知原來有商場騷，當日嘅嘉賓就係近日經常見到嘅周嘉洛。

15集《回歸》播完，緊接嘅《痞子殿下》又有周嘉洛，今次仲係擔正做主角，同劇仲有陳瀅、朱敏瀚、張頴康、JW。套劇走瘋狂怪誕喜劇路線，唔跟邏輯冇路捉，對白亦唔會文縐縐懶高深，似《蓋世豪俠》x《秀才遇著兵》x 古裝版《皆大歡喜》。霸戲哥睇完第一集，見到唔少惡搞元素，好似「堅定樓」、「四圍酒棧」、「碧璧青樓」咁，暫時都覺得幾盞鬼。

古裝劇從來都有個限制，就係怕穿崩位，同埋冇得植入廣告，賺少好多廣告收入。《痞子殿下》就冇呢個框框，仲攞正牌玩嘢，大大隻「海馬牌」logo喺架馬車度，編劇係有啲計。

輕輕鬆鬆一粒鐘，膠吓膠吓又一day。爽皮。