博客文章
霸戲哥對泰拳嘅印象，就只有街頭霸王嘅「睇腳鴨腳紮」（Tiger Uppercut）
同Tony Jaa，大部份認知都係嚟自電影。至於賽制、規例、打法統統冇研究，只知好似用腳多過用手，而招式比一般武術凶狠同毒辣。
原來，泰拳已經有五百幾年歷史，亦被視之為神聖活動。泰國人篤信佛教，開賽前都會有敬神嘅祈禱儀式，選手進場時鼓鳴笛響，又披戰袍又戴聖圈，極之莊嚴。但你又點估到，喺神聖、激情、熱血同榮耀嘅背後，居然係貪婪、醜陋、腐敗同罪惡嘅溫床？
Netflix最近上架有套幾過癮嘅劇集《痛心疾首泰拳真面目》，佢用偽紀錄片方式，講解成個泰國拳擊比賽嘅運作，同揭示種種陰暗面，好似賭博、操控拳賽同放貴利數咁。你會發現無論賽判、拳手、教練、評述員、醫療團隊、拳評家、拳賽專家、以至觀眾、賭仔，總之同拳賽掛勾嘅人，統統都有份「養大」呢隻惡魔。不幸捲進漩渦嘅，小則妻離子散，大則斷送性命，都咪話唔害人不淺。
套劇總共四集，每集用不同視角去探討泰拳真面目，個人認為好值得一睇。
霸戲哥
** 博客文章文責自負,不代表本公司立場 **
聽日就8月，意味住歐洲三大影展之一嘅威尼斯影展即將舉行。今年嘅焦點，係破天荒以串流平台Netflix製作嘅電影《White Noise》做開幕電影。
串流平台電影同傳統電影院播放嘅電影，一直存在矛盾，但隨住新冠肺炎改變咗大眾嘅生活模式，兩者嘅排斥性大幅降低，好多荷李活片商、導演都投放資源拍串流平台電影。有別康城影展，威尼斯影展對Netflix電影持比較開放態度，如2018年Alfonso Cuarón憑《Roma》捧走最高榮譽金獅獎；去年Jane Campion亦憑《The Power of the Dog》摘下最佳導演獎。
今年23套競賽電影入面，除咗Noah Baumbach執導嘅開幕電影《White Noise》，仲有Andrew Dominik嘅《Blonde》、Romain Gavras嘅《Athena》，同埋Alejandro González Iñárritu嘅《Bardo》，都係Netflix嘅原創電影。
隨住威尼斯影展8月31日開幕，如果Netflix一個唔覺意贏幾個大獎，唔知會唔會增加返訂戶呢？
