七師傅為《唱笑會》密密綵排 被抱起再凌空轉圈嚇到尖叫

七師傅嚇到嗌停話好驚！

七師傅(七仙羽)處女下海，將於本周(12及13日)在九展舉行《師傅七都識唱笑會》，日前綵排期間，有份演出的龐景峰竟一手兜住七師傅大髀內側，一手捉住師傅隻手，然後將她身體撻上膊頭，並急速轉咗一圈，險象環生！七師傅明顯受驚尖叫，MIRROR演唱會事故在前，七師傅即喊停話：「我好驚，呢個騷唔出得意外㗎！」

七師傅大讚MIRROR首場演唱會好精彩。

MIRROR前周四（7月28日）嘅第4場紅館演唱會發生嚴重意外，懸掛半空嘅巨型屏幕突然跌下，擊中舞蹈員李啟言（阿Mo）和張梓峯。MIRROR演唱會事故發生後兩周，輪到七師傅開show，見七師傅邊用餐邊跟主辦單位老闆張顥霖(Henry)密斟，對個show所有細節位都要問得清清楚楚，不容有失。

龐景峰一手捉實師傅隻手，一手箍住師傅大髀內側轉圈，位置好敏感。

七師傅被龐景峰抱起再凌空轉圈，嚇到嗌停話好驚。

師傅落地時一度搖晃失重心，身體帶點傾斜，故作鎮定笑住合十。

開騷打「天才波」靠執生

當晚演員七師傅、鍾雨璇、徐蒨寧、龐景峰、齊釨湮、符曦文、和泉素行齊集，對完戲，馬上爭取時間排練。劇情係講唐七藏取經途中收服3隻妖精，期間，龐景峰竟「孫悟空」上身好鬼high，更因應對白需要，他講完一句：「師傅唔好介意。」就示意師傅起身，並一手兜住師傅雙腿內側位置，一手捉住師傅隻手，將師傅撻上膊頭，再好快咁轉咗一圈，師傅喺毫無「預警」下嚇到雙腳亂踼兼失神大叫：「我好驚呀！唔好再轉，轉到暈喇…」見師傅落地時一度搖晃失重心，身體帶點傾斜，故作鎮定笑住合十。

師傅邊工作邊玩貓，她強調寵物能帶人歡樂，平衡心靈，有助家運，但大前題要有時間照料先好養。

七師傅食住嘢跟主辦單位老闆張顥霖密斟唱笑會細節。

驚魂甫定後，七師傅認真表示，演出時一定唔可以再轉：「太驚太驚喇，萬一跌咗落嚟就麻煩喇，呢個show唔出得意外㗎！」師傅又指雖然今次演出打「天才波」，但唱歌、跳舞加埋記對白都好辛苦，做完今次唔打算再搞：「今次當做慈善，除捐酬勞仲會佈施快樂畀人。」

演唱會發生事故當晚，師傅叫晒弟子徹夜為傷者唸經。

叫弟子徹夜為傷者唸經

提到MIRROR紅館演唱會嚴重事故，對師傅未有造成演出陰影：「局方反而會重新審視表演場地，舉辦演出活動嘅安全性，所以觀眾會睇得更加安心，更何況我又唔係開紅館Show，舞台會簡單好多。」師傅亦唔擔心會影響到將來演唱會嘅舞台設計及製作：「坦白講，好多觀眾係嚟睇人，睇唱歌及跳舞，唔係嚟睇個台，只要有觀眾周圍都係舞台，就算冇個台企喺街邊唱都得，最緊要係安全。」

由於唱歌、練舞、排戲太辛苦，七師傅話做完今次下不為例。

之前為唱笑會跟徒弟「八鮮乳」郭奕芯秘密練舞。

師傅話喺《七救星》中耍過嘅「閃電7連鞭」經已Out咗，𠵱家仲未搵到對手玩「狗吠鞭」。

發生意外後，師傅叫晒弟子徹夜為傷者唸經：「我睇第一場MIRROR演唱會真係好精彩，佢哋用咗咁多時間嚟排，大家都唔想發生呢啲事情，暫時畀佢哋休息同埋消化吓。」七師傅跟ViuTV合作無間，她力撐不論台前幕後，甚至高層都好nice，大家有商有量，互相幫助，唔係外間所講得咁負評，反而好有人情味。

「妖精」徐蒨寧(右一)、齊釨湮(後)、符曦文(左一)迷惑七師傅「唐七藏」。

七師傅話開Show太辛苦，下次咪搞。

前陣子前往英國舉行MIRROR巡唱的陳卓賢Ian，趁空檔時間於倫敦拍攝了最新單曲《Thank You Postman》的MV，當中的情節，正是上一首作品《Lost at first sight》的延續。

陳卓賢（Ian）推出新歌《Thank You Postman》。

《Thank You Postman》由Ian作曲，陳詠謙填詞，是二人繼2020年《正式開始》後再一次合作的作品，歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地，但心靈上依然形影不離，連繫一起，並憑藉寫給對方的信件聯繫感情，而郵差為這段感情扮演了重要角色。現在資訊科技發達，Ian現在都不會寫信了，但他回憶道：「我以前有寫過信，但寄就比較少，因為多數親手俾，我唔係一個好擅長用言語去表達自己嘅一個人，所以過去會選擇寫信。」雖然現在機會少了，但問到在英國巡唱時的Ian，若要寄出一封信，他選擇會寄給他的粉絲Hellosss，Ian說：「希望你哋都接收到呢封信，雖然我而家唔喺香港，但都收到你哋對我嘅支持，呢封信係回饋返呢份愛俾你哋。」

相關影片可以按以下畫面觀看：

影片連結：

Ian到英國巡唱趁機拍攝新歌MV。

歌曲延續了《Lost at first sight》的故事發展，講述一對情侶各自追逐自己的夢想或目標而分隔兩地。

因為要到英國開Show，所以Ian出發前忽發奇想，他說：「既然一場嚟到，睇下會唔會安排到少少時間拍到MV一啲片段。今次呢隻歌同MV，係講男仔去咗第二個地方去追佢嘅夢想或者做佢要做嘅嘢，女主角唔係喺同一個地方，各自努力緊自己嘅嘢，其實某程度上大家好多嘢都係同步嘅。」剛好Ian身處英國，扮演女友的許恩怡Natalie在香港，二人各自分開拍攝，香港及倫敦穿插於MV畫面之中，直截了當表達了兩人分隔異地的關係。

Ian身處英國，扮演女友的許恩怡在香港，二人各自分開拍攝，直截了當表達了兩人分隔異地的關係。

由於在英國的行程緊密，Ian當日從香港飛抵倫敦，便立即投入MV拍攝，他坦言都有點吃力，他說：「第一次嚟倫敦，一落機就拍攝，因為Jet lag，都幾辛苦，呢種感覺令我諗返起當日拍攝《正式開始》MV，又係拍完劇就飛通宵機去日本，又係去到機場就即刻開始拍，係好攰，而家喚醒咗當時嘅記憶。」Ian更搞笑道：「唔得喇，好攰！我而家已經想瞓覺。」

難得身處異地，除了拍攝MV外，未知Ian可會在旅程中尋找創作靈感？他說：「又好少去尋找，有陣時係突然有啲嘢出咗嚟，多過主動去尋找。我搭飛機多數唔係好瞓到覺，所以反而係喺飛機上面，我都有寫到一首歌出嚟。」

情歌系列作品第二章。

今年這個音樂系列作品已來到第二章，被問到將會有多少個章節，Ian大賣關子道：「大家要密切留意，即係好似睇一套電影，譬如《哈利波特》，如果一早知道幾多集，就大概知道劇情點樣發展，但我想大家一路追一路期待會好啲。」想知劇情如何發展，大家都要繼續追聽下去了！

Ian欲寫信回饋粉絲愛意。