霸戲哥之日常#350｜ 凶宅清潔師

盂蘭節快到，大家未碰到污糟嘢之前，就先畀一堆靈異影視作品包圍。之前喺myTV SUPER大受好評嘅靈異劇《凶宅清潔師》，徇眾要求下，將會喺今個禮禮六夜晚10點半喺J2首播。

套劇叫《凶宅清潔師》，霸戲哥第一時間以為係《救僵清道夫》啲friend，但原來無乜關係嘅。洪永城飾演嘅招仔，18年前因為玩碟仙玩出禍，間接累死老竇老母，為咗報復，決心學捉鬼搵碟仙鬼報仇，慢慢揭開事件真相……好一齣《金宵大廈》x 《18年後的終極告白》（笑）。

現實生活入面，都有唔少人因為玩碟仙而走火入魔，有人因為惶恐而一沉不起，被其他人以為「撞邪」。招仔都一樣，18年嚟一直內疚害死全家，冇辦法過正常生活。點樣先可以走出陰霾擺脫心魔？或者就係套劇想帶出嘅訊息。

最需要清潔嘅，唔係凶宅，係自己嘅心房。

霸戲哥

** 博客文章文責自負,不代表本公司立場 **

正常香港人，人生總會遇到一個難題，就係買樓。就算有父幹，唔憂冇瓦遮頭，你都會猶豫買邊層樓，好聽啲講叫投資，實際啲叫錢滾錢。

全世界好似只有香港呢個畸形地方，先造就到呢個畸型樓價。今時今日，年輕人想置業，條路雖則好似越嚟越遠，但唔代表完全冇機會嘅（好似係）。吸收多啲樓宇知識，等待時機成熟同運氣到，總有機會一嘗業主夢。

以往啲樓盤節目千篇一律，都係搵靚女參觀吓示範單位，冇乜新意，就算間屋裝修到靚一靚又點？對觀眾嚟講，咪又係得個「睇」字。TVB最新節目《樓價有得估》就唔同，用問答遊戲方式嚟講解樓宇資訊，輕鬆得嚟又有啲嘢落袋。

原來八十年代喺何文田買層樓，首期（1%）只需要畀11000蚊就做到業主，三十幾年後，層樓最少值2000萬……

諗諗吓，都係可樂最抵。80年代兩個半一罐，今日都係賣緊三蚊咋，如果買pack裝。