霸戲哥之日常#356｜ 泰恐怖

呢個世界有咁多「史上最恐怖鬼片」，究竟邊個地方出產嘅先至最恐佈？日本？歐美？泰國？台灣？抑或土炮呢？

呢個問題就好似「武術之王」同「兵器譜排名」一樣，個個都話自己天下第一，實情根本冇一個標準。

之不過計往績，泰國鬼片係有一定驚嚇力保證，好似《鬼影》、《4條大路通陰間》同《陰容院在》呢啲，諗番起都怯怯哋。

嚟緊Netflix就有齣泰國鬼片《泰恐怖校園怪談》上架，套戲改編自八個恐怖漫畫，都係關於校園嘅故仔，當中不外乎有女學生跳樓呀、圖書館鬧鬼呀、學校canteen賣人肉嗰啲。雖然我哋讀書嗰陣都聽唔少，但因為發生喺我哋唔熟悉嘅泰國，文化背景又唔同，係會多咗份神秘感，大大提升驚嚇度。

霸戲哥承認有少少種族偏見，硬係覺得啲泰仔泰妹「邪邪哋」。有冇人有同感？

霸戲哥

** 博客文章文責自負,不代表本公司立場 **

朋友圈最近發起一個challenge，叫「#一口氣睇晒救命卡特」，聽聞難度比連玩10次過山車同等。迄今為止，冇人坐定定睇晒而唔嗌救命。很想挑戰吧！

呢套「白花油呈獻」嘅《救命卡特》啱啱喺Netflix上架，由《惡女》導演鄭秉吉執導，故事講述兩韓非軍事區爆發致命疫情，周元飾演失憶特工，只知要執行一項特別任務，就係誓死保護擁有解毒基因嘅女仔，否則體內炸彈裝置會引爆。劇情狗血到呢⋯⋯

但最惡頂嘅並唔係劇情，係導演用「偽一鏡到底」嘅拍攝手法執行，仲要全程用hand held，搖到阿媽咁。呢種「一鏡到底」嘅拍攝手法，可以見到導演嘅堅持——就係堅持唔顧觀眾感受。

霸戲哥忍唔住開咗嚟睇，10分鐘已經搽咗半枝白花油，頂唔順，放棄了。

呢度有冇高人頂晒？