霸戲哥之日常#361｜ 照片中的女孩

點先算係世上最慘嘅新聞？

年輕女子遇車禍喪生？未算。
原來年輕女子唔係死於意外，係俾人辣手催花？未算。
原來年輕女子死前被綁架、禁錮、性虐，仲要長達超過十年？都仲未算。
原來年輕女子死咗超過30年，一直冇人知佢嘅真實身份，連墓碑個名都係假嘅。

Netflix最近有齣犯罪紀錄片《照片中的女孩》，還原呢單轟動美國嘅案件。紀錄片由一單可疑車禍揭開序幕，名為Tonya Hughes嘅脫衣舞孃意外喪生，但死前其丈夫Clarence Hughes幫佢買重保險，令警方引起懷疑。後來一路調查，更揭發更多恐怖真相：Tonya Hughes身份不明、佢個仔Michael被綁架兼失蹤、Clarence Hughes真名原來叫Franklin Delano Floyd，係犯案櫐櫐嘅危險人物。最恐怖係，Tonya畀呢個禽獸支配控制超過十多年，到死一刻都冇辦法逃離對方魔掌。

呢單案之所以令人糾結，就係即使拉到Floyd呢個魔頭，都冇辦法破案。因為唯一知道Tonya身世、Michael係生定死嘅人，就只有Floyd。假使Floyd合埋口乜都唔講，呢單案永遠都唔會出落石出。

世上就係有啲咁荒唐嘅事，而且係每天都在發生。所以你話人恐怖定鬼恐怖？

霸戲哥

** 博客文章文責自負,不代表本公司立場 **

噚晚J2嘅《關注關注組》，討論「MK仔女衣着大選」，一眾主持Juliana、何泳芍、Jessica同Clevis齊齊以MK look亮相，最後Jessica以齊蔭頭配大眼con勝出，成為MK王者。

新冠疫情持續咗兩年幾，霸戲哥同豬視妹都唔知幾耐冇去過MK，對上一次去條街都冇乜人，想搵個MK妹昅吓都難。

霸戲哥都年輕過，但本身對MK文化唔太熱衷，所以唔會模仿MK仔嘅衣着，仲有啲鄙視添。當年嘅MK仔，大多受《古惑仔》電影影響，喇叭牛仔褲加條鐵鍊吊吊揈，配件窄身開胸裇打出個排骨胸同鍍金嘅鍊，哪裏來的自信先着得出街？

20年前嘅MK仔，好彩啲嘅都做咗人老竇／阿爺啦，今日當然收歛晒。不過嗰陣麻甩味係好難搣甩嘅，大家不妨留意吓，依家着住對crocs周街走嘅中坑，20年前九成九係MK潮童。信不信由你。