啟德跑道區仲有無地方起單軌列車？

近日啟德單軌再次被傳媒炒起，有傳跑道九大發展商向政府獻計重啟單軌方案。但有網民質疑，現時跑道嘅主要幹道上方已興建空中花園（圖一），仲邊有位再起單軌？

圖一：跑道區承豐道上嘅空中花園，留意只有向內海一方有隔音屏

細心嘅網友可能會發現，承豐道空中花園係2015年扑鎚動工，而單軌係2020年先被擱置，所以政府設計空中花園時一定已預留位置擺放單軌。另外，如仔細觀察空中花園嘅造型，會發現只有靠近啟德內海嘅一邊建了隔音屏，而靠近維港一方則空空如也，點解會有咁唔對稱嘅設計呢？

答案正正係因為要預留位置興建單軌鐵路。參考返政府土木工程拓展署嘅文件，可見空中花園下方嘅花圃預留了位置興建單軌高架系統（圖二），而單軌列車嘅高度會略高於空中花園現時嘅升降機（圖三）。

圖二：空中花園構想圖（取自土木工程拓展署文件）

圖三：空中花園比例圖（取自土木工程拓展署文件）

睇返土木工程拓展署係2015年嘅單軌概念短片，可清楚睇到單軌列車會建於空中花園旁邊，並於跑道中及尾興建車站（圖四及圖五）。由此可見，跑道起單軌係技術上絕對可行，但最後能唔能夠重啟就要睇政府嘅取態，以及九大發展商嘅牙力。

圖四：構想單軌及跑道區中部嘅車站位置（截圖自土木工程拓展署單軌概念短片）

圖五：構想單軌及跑道區尾部嘅車站位置（截圖自土木工程拓展署單軌概念短片）

參考資料：

《711CL號工程計劃 – 啟德發展計劃 –前跑道南面發展項目基礎設施工程及啟德發展計劃進度報告》：
https://www.legco.gov.hk/yr14-15/chinese/panels/dev/papers/dev20150428cb1-798-1-ec.pdf

土木工程拓展署於2015年發佈嘅單軌概念短片：https://youtu.be/IKQg9Nrj-xI

若想睇到更多關於啟德跑道區嘅最新資訊，請Follow本文章作者Facebook專頁《啟德跑道日誌》：https://www.facebook.com/啟德跑道日誌-100870982705316

啟德跑道日誌

** 博客文章文責自負,不代表本公司立場 **

啟德單軌系統經歷咗十幾年嘅詳細研究後，終於喺2020年正式被政府擱置。其主要死因係成本過高及觀塘段嘅高架系統違反消防安全要求。而政府提出嘅後備方案 — 多元組合系統，說穿了只係電動巴士配上行人電梯網絡，其運載能力明顯遠遜於有軌交通，亦遠遠未能照顧日益增加嘅啟德居民及大量東九上班族嘅通勤需要。

其實早在2013年，電車公司曾建議政府採用現代化電車系統取代單軌列車（圖一）。由於不需建造高架設施，當時建議嘅電車系統造價只係單軌系統嘅四份之一，而且電車嘅班次及載客量可因應需要而靈活調節，令此計劃係社會上收獲不少支持聲音。可惜嘅係，當年政府指電車系統由於需要佔用大量路面空間，會令早已迫爆嘅路面交通更為擠塞，所以執意放棄現代化電車計劃，轉投聚焦已證實係掘頭路嘅單軌系統。

圖一：電車公司於2013年建議嘅現代化電車走線

但電車系統是否真如政府所說，必然要佔用車道呢？答案係否定嘅。根據政府文件，雙線電車軌需佔用嘅闊道約7米（圖二）。實地考察過啟德、九龍灣及觀塘嘅道路情況後，發現只要將電車走線適當調整，大部份嘅電車軌道其實不需佔用車道（圖三紅色走線）。

圖二：現代化電車嘅規格（取自政府文件）

圖三：新建議嘅現代化電車走線

例如由啟德體育園，經啟德車站廣場，至沐翠街一帶本身已預留大量行人道或花圃位置以興建環保連接系統。而跑道區一帶，電車軌道可建於面向啟德內海嘅海濱走道（圖四）。至於係觀塘區，只要將現時觀塘海濱走廊嘅綠化地帶作少量改建，即可容納雙線電車軌道（圖五），令電車網絡可延伸至觀塘行動區。唯獨九龍灣商業區一帶嘅走線無可避免地要走進現行車道（圖三藍色走線）。因此，建議此段路可採用混合路權，雖然會因而減慢電車嘅行進速度，但卻可大幅減少對路面交通嘅影響。

圖四：現代化電車於跑道區海濱嘅示意圖（圖片及尺寸取自政府文件）

圖五：現代化電車軌於觀塘海濱嘅擬建位置（紅圈範圍）

當然，針無兩頭利，利用海濱走廊作電車專線會佔用了原本行人道及單車徑嘅空間。但其實啟德新區本身嘅行人路同單車徑已經好充足，例如跑道區承豐道已建設行人專用嘅空中花園，以及跑道前排向維港一面嘅海濱亦已規劃了闊數十米嘅行人道及共融單車徑。所以即使電車佔用了部份內海海濱走廊嘅位置，對行人及單車前往啟德跑道嘅暢達程度影響相當輕微。

圖六：現代化電車嘅電車軌可綠化，以融入海濱走廊嘅綠化環境

由此可見，只要重組走線，現代化電車對路面交通嘅負荷其實遠低於政府早前嘅預估。希望現屆政府及社會能重新考慮採用啟德現代化電車系統，及早改善啟德及東九龍嘅交通。

作者Facebook專頁：啟德跑道日誌