霸戲哥之日常#365｜ 祖藍閨密

霸戲哥以為王祖藍主持嘅《有個閨密叫祖藍》，咪又係一般嘅訪談節目，所以起初都冇乜特別關注。噚晚因為嘉賓係Fiona，而咁啱英超頭場又悶悶哋，就轉台過去睇咗陣。祖藍的確係有計，起碼撬得開Fiona把口，令對方放下戒心，坦誠講出心底話。某程度上，亦幫到對方釋放自己。

咪畀Fiona個後生樣呃到，其實佢都出道近20年，霸戲哥「細細個」就聽佢啲歌，佢隻《'F' Debut》CD依家仲喺舊屋企。當然佢首《奇洛李維斯回信》最出名，但霸戲哥更愛《麥當娜一吻》，當年失意時日loop夜loop。

Fiona一直被塑造成大笑姑婆形象，拍嘅戲多數搞笑為主，但經驗話畀我哋知，表面上越開心嘅人（尤其女藝人），就越容易患上情緒病。好不幸地，Fiona亦唔例外，喺佢最唔開心嘅時候，曾經諗過尋死，係方大同救番佢一命。

但要克服情緒，身邊人最多只可以幫你一把，最重要都係靠自己。依家諗番轉頭，其實周耀輝填嘅《麥當娜一吻》已經講晒。

霸戲哥

** 博客文章文責自負,不代表本公司立場 **

最近霸戲哥介紹過N記嘅泰國鬼片《泰恐怖校園怪談》，可惜好多網民都唔太收貨，話呢套嘢似《殭屍校園》，又話啲CG「泰搞笑」，一啲都唔恐怖。

霸戲哥同豬視妹睇咗其中一個故仔《早上7點》，又唔覺得泰難睇啫，故事結構都算完整，懸疑氣氛可能爭啲，或者未滿足到膽大嘅觀眾啦。

《早上7點》個故仔其實幾得意，係講有女鬼每朝喺黑板留字，提示學生當日要帶嘅課本，唔記得帶就會死，而佢嘅生存痕跡亦會被永久刪除同遺忘。結果成班學生為咗本書，互相猜忌、出賣同陷害，最後連最正義嘅主角，都露出邪惡真本色。都話人心最恐怖架啦。

霸戲哥以前讀嗰個名校中學，就係盛產呢類自私自利嘅仆街，平日冇事冇幹就扮友善，一遇問題就推卸責任同篤灰。講真，人格低劣畀你考到10A又有咩用？