霸戲哥之日常#363｜ 人血饅頭

好多人問霸戲哥點睇MIRROR演唱會事故，本來一單咁不幸嘅事，都唔想講太多，亦冇乜資格講太多。只希望受傷嘅人，無論係dancer抑或患創傷後遺症嘅人，可以盡快康復。

事件發生到依家都近半個月，可惜ViuTV同MakerVille一直採取冷處理策略，唔就事件公開回應，又難怪鏡粉都感到氣憤。直至今日，MakerVille終於發出聲明，交代MIRROR暫停活動兩個月，又承諾會嚴肅跟進事件，調查有冇人為疏忽。

當然仲有好多鏡粉會對呢篇聲明好不滿，覺得MakerVille「卸膊」，刻意同「舞蹈工作室」劃清界線，字裏行間又冇慰問傷者半句。霸戲哥就咁睇，事到如今，其實將篇聲明寫到「曉飛」，作用都不大，所以聲明好壞唔係討論範圍。

霸戲哥比較關住一點：賣飛就高調，出事就低調。呢件饅頭食得實在太難睇。

有朋友分享過一個買MIRROR飛嘅「逸事」。話說有PCCW嘅sales氹佢落叠，聲稱只要加錢（定加簽啲嘢），就可以「好大機會」換取MIRROR飛。朋友撲飛心切，速速磅水，最後如願換到MIRROR飛，但位置竟然係「視線受阻」，搞到朋友喊得一句句。後來，嗰位sales唔敢得失呢個大客，就用另一張演唱會飛嚟安撫佢，點知竟然係——七仙羽唱笑會飛。

作為一間私營公司，賺錢當然係首要，但係咪吓吓都要賺到咁盡？同賺得咁急？仲有一點令霸戲哥很不爽，點解好似仲未有高層離職？難道又想低調處理？

霸戲哥

** 博客文章文責自負,不代表本公司立場 **

霸戲哥唔鍾意去蒲，一來唔好酒，二來媾女弱項，落到夜場齋坐盞冇癮。講到蒲，我老友B哥先係SS級專家，素來以「港島識人王」自居嘅佢品女無數，招數唔多但憑一個字——勇。雖然B哥早已金盤洗手，但獵艷史仍然喺朋友圈中廣傳。

今晚J2節目《開壇》，主題就係講「夜蒲」。蘇民峰師傅分享唔少old school嘅夜蒲經歷，以前唔講「去蒲」，係講「去wet」，嘩娘到打冷震。

夜場黑炆炆，就算帶眼識人都未必睇得咁清楚。不過，蘇師傅話鹹濕有樣睇，就係睇佢個嘴唇：上唇主感情，下唇主情慾。之但係落得夜場，唔通搵真愛咩？搵個厚下唇嘅也不為過。

話時話，B哥嘅下唇都唔係好厚啫。結論係，面皮厚緊要過下唇厚。