霸戲哥之日常#371｜ 雲吞麵

黃Sir係雲吞麵癡。全港九只要有賣雲吞麵嘅舖頭（包括一粥麵），佢都必定光顧過。網上嘅雲吞麵關注組，如果要請食評專家，黃Sir一定係最有資格。

因為黃Sir關係，霸戲哥亦有幸品嚐過唔少雲吞麵名店，好似麥文、麥奀、麥兆、沾仔記統統食勻，勉勉強強都可以扮吓專家。

雲吞麵又叫作餛飩麵，按分量分大蓉、中蓉同細蓉，窮人食細蓉居多，所以又成為雲吞麵別稱。

人地話雲吞麵最重要三樣嘢：麵底、湯頭同雲吞料。霸戲哥認為應有次序之分，湯頭先係一碗雲吞麵嘅靈魂。至於湯頭點為之好？有啲雲吞麵舖一味落大地魚去熬，結果湯頭帶腥，仲有層黏黏哋嘅膠質，失敗。有啲就加味精同胡椒，結果湯頭變「死鹹」，食完仲鬼咁口渴，失敗中嘅失敗。

好嘅湯頭，一定要用蝦籽、大地魚同豬骨用慢火去熬，湯色要清澈，而重中之重係適量嘅韮黃。冇韮黃嘅雲吞麵基本上可以blacklist。

霸戲哥出世遲，冇經歷過《花樣年華》蘇麗珍拎住暖壺買雲吞麵消夜嘅日子，但細過食嘅第一碗雲吞麵都仲記得，就係喺灣仔近鵝頸橋嘅大排檔，時為五蚊一碗。

噚晚嗰集《滿足的味道》黎諾懿就係介紹雲吞麵，大家得閒可以上myTV Super重溫。

霸戲哥

** 博客文章文責自負,不代表本公司立場 **

大家有冇統計過有幾耐冇睇過明珠台？實不相瞞，霸戲哥甚至連明珠係第幾台都唔知。記得以前久唔久會播啲荷李活猛片，但之從訂咗Netflix同Disney+，真係冇乜機會撳過去明珠。

明珠台嘅節目從來都係提供畀小眾，又或者外籍人士收睇，你又點估到，連明珠台都想喺黃金時段搶收視？今晚就有原創節目《Love Matters with Grace》推出，由陳凱琳擔任監製同主持，佢每集邀請一班好姊妹，分享吓愛情觀同人生態度，首集嘉賓就有靚女人妻朱千雪，可觀性好高。

平時喺翡翠台見到陳凱琳同朱千雪，唔覺有咩特別，但今次搬到嚟明珠台，要用英文交流，當堂醒神好多。證明靚女講英文，仲要係純正流利嘅英文，係寧舍吸引。

節目逢禮拜三晚播出，唔知下集又會請邊位靚女上嚟講英文？