霸戲哥之日常#376｜ 咪一X樣

呢兩星期班波友不停傳來惡搞圖，配上「咪一X樣」字句，揶揄曼聯換變個領隊都好，結果都係一樣。開局連輸兩場，仲要輸畀中游嘅白禮頓同升班馬賓福特，依家積分榜排包尾，認真羞家。

今夜凌晨上演今季英超第一場雙紅會，主場迎戰上屆亞軍利物浦，睇怕都凶多吉少。往年雙紅會，一街都係波衫佬，今年曼迷忽然低調，慌死畀人知佢哋曾經喺巴士頂高呼「魚拉突」。

霸戲哥係熱刺迷，對兩隊波都冇乜感覺。但豬視妹都係「魚拉突」粉絲，都唔想睇住佢偷偷哭波喪。至於你問曼聯有咩策略突圍？依霸戲哥愚見，曼聯唔能夠好似中游球隊泊大巴死守，因為有麥麥送嘅後防線絕對係計時炸彈。至於想用高位迫搶嘅體力打法，就唔能夠出C朗，唔係話佢體能做唔到，係浪費咗佢進攻嘅體力。另外中場線我極唔建議用B費，條友鬧隊友嘅氣力仲多過去搶波。

對利物浦取勝嘅方法，霸戲哥認為只可以孤注一擲，對攻快打快，上半場盡出後生仔，以高位迫搶打亂利物浦行軍節奏，伺機偷雞，上半場目標係和波。下半場再放C朗出嚟，用兩翼側擊博混亂，體力充沛嘅C朗係贏波關鍵。

霸戲哥亂噏就叻，真係執行嘅，都係嗰句—「咪一X樣」。

霸戲哥

** 博客文章文責自負,不代表本公司立場 **

往年嘅呢啲日子，霸戲哥同豬視妹一定喺台灣慶祝生日。近年因為疫情，邊度都冇得去，你話唔掛住台灣就假。最記得豬視妹同霸戲哥講，反正都係躺平，不如移民去台灣躺，起碼生活指數低過香港好多吧。

呢番說話看似有啲悔氣，認真諗又唔係真係冇道理。但你話住一兩個禮拜當然冇問題，長住又會唔會完全兩回事？

今晚J2推出新節目，由曾寶儀主持嘅《香港人的台式生活》，就會探討港人來台生活所遇到嘅文化衝擊。佢哋嚟自唔同階層，當中有人被迫滯留、有人想尋求機遇、有人想轉換環境，亦有人非走不可。

霸戲哥覺得，無論喺邊度生活，都應該抱住一個目標，就係勇敢生存落去，盡量感受呢個世界嘅美好。