霸戲哥之日常#379｜西環早茶

滿足的味道，霸戲哥認為唔一定要光顧米芝連三星，又或者嘆嚐絕世佳餚。相反，幫襯越貴嘅食肆（尤其窮人），通常餐飲體驗都越差，正是貼錢買難受，又何來滿足？

噚晚嗰集《滿足的味道》主題係點心，咁啱黎諾懿介紹一間西環茶樓，勾起好多大學時期嘅瘋狂回憶。

霸戲哥嘅大學生活，只可以用荒唐兩個字嚟形容。因為住Hall冇王管關係，作息混亂、日夜顛倒唔在講，最離譜係喺球場嘅時間，遠遠超過喺lecture room。嗰個年頭，大學生係天之驕子，真係求其hea住都碌過。

當時嘅U life，其實都幾「規律」。夜晚六點起身食「早餐」，之後打AOE同Diablo2，中間天九打幾口莊，贏錢就吹雞飲早茶。最後天光練早波再返hall大覺瞓。轉眼就玩咗人生最美好嘅三年。

至於幫襯嘅茶樓，來來去去得兩間，一間喺薄扶林村，另一間就喺西環電車路近街角位。兩間茶樓嘅點心，其實味道都好一般，但偏偏我哋呢班Kong U仔，就係貪佢浸懷舊味同人情味，喺其他地方永遠食唔到。諗番轉頭，呢啲咪就係滿足嘅味道囉。

事隔廿幾年，好多嘢都唔同晒，莫講話茶樓唔見咗，依家嘅hall life都好唔一樣。至於當年嘅「茶腳」，有啲已經遠走他鄉，有啲已經不相往來，諗起都有啲欷歔。

霸戲哥

** 博客文章文責自負,不代表本公司立場 **

J2今晚又有新飲食節目叫《開餐：台灣3點3》，由火辣華姐冠軍余思霆主持，實在太易惹人遐想啦。人哋話秀色可餐，鹹濕仔掛住昅余思霆，真係會忽視咗節目嘅主角，其實係台灣嘅下午茶甜點。

唔知幾時開始，香港人唔再興講嘆下午茶，而係叫high tea，唔通感覺真係high啲？Anyway，霸戲哥得罪講句，叫得high tea嘅，都係港女居多，食物質素同味道已經唔太重要，最重要係外觀，方便打卡放IG。所以又唔知幾時開始，茶餐廳、冰室都開始upgrade，紛紛推出啲賣相特別嘅食物，反而最傳統、最賺錢嘅快餐，慢慢被淘汰。

台灣都算係走在潮流尖端，呢啲呃like食肆越開越多。最辛苦係一班做旅遊天書嘅編輯，時不時要update本書，明明普通一件忌廉蛋糕，都被吹捧到人死前必食之選。真心佩服啲marketing高手。

啱啱睇完第一集《台灣3點3》，主持介紹咗三間日式甜品店，或者霸戲哥唔太鍾意日式甜品，印象始終唔太深刻，所以都冇特登去search吓間舖。

甜品嚟講，霸戲哥都係鍾意傳統嘅中式糖水。話時話，去隊番碗紅豆沙先。