霸戲哥之日常#383｜ J2監察站(29)：Tesla

J2新節目《邊度都有外星人》今晚登場，以《邊度都有陰謀》原班人馬陸永同鄭子誠主持，仲有外星文明研究者Tecki做嘉賓主持，第一集主題就係圍繞近年名字響噹噹嘅Nikola Tesla。點解係佢？因為根據FBI嘅絕密檔案（Nikola Tesla Part03 of03），話Tesla其實來自金星……

細過睇嗰啲咩百大偉人故仔書，愛迪生經常榜上有名，偏偏就冇乜點提Tesla。直至電動汽車公司用咗佢個名，大眾先至將Tesla掛喺口邊。

生於1856年嘅Tesla，可以話係最接近神嘅天才發明家。畢生超過700件發明，超出同期水平300年。單單是交流電呢項技術，就已經造福咗全球幾十億人。另一項偉大發明，就係無線電，今日我哋能夠享用智能手機、電腦、GPS、衞星系統，統統都係靠呢項技術。

再數下Tesla嘅其他發明：人造閃電、感應電動機、變壓器、X-ray、收音機、
霓虹燈，每一樣都嚇得死人，好難唔相信佢係來自外星。

想知道多啲Tesla嘅神秘事蹟，今晚11點一齊睇《邊度都有外星人》。

霸戲哥

** 博客文章文責自負,不代表本公司立場 **

J2今晚又有新飲食節目叫《開餐：台灣3點3》，由火辣華姐冠軍余思霆主持，實在太易惹人遐想啦。人哋話秀色可餐，鹹濕仔掛住昅余思霆，真係會忽視咗節目嘅主角，其實係台灣嘅下午茶甜點。

唔知幾時開始，香港人唔再興講嘆下午茶，而係叫high tea，唔通感覺真係high啲？Anyway，霸戲哥得罪講句，叫得high tea嘅，都係港女居多，食物質素同味道已經唔太重要，最重要係外觀，方便打卡放IG。所以又唔知幾時開始，茶餐廳、冰室都開始upgrade，紛紛推出啲賣相特別嘅食物，反而最傳統、最賺錢嘅快餐，慢慢被淘汰。

台灣都算係走在潮流尖端，呢啲呃like食肆越開越多。最辛苦係一班做旅遊天書嘅編輯，時不時要update本書，明明普通一件忌廉蛋糕，都被吹捧到人死前必食之選。真心佩服啲marketing高手。

啱啱睇完第一集《台灣3點3》，主持介紹咗三間日式甜品店，或者霸戲哥唔太鍾意日式甜品，印象始終唔太深刻，所以都冇特登去search吓間舖。

甜品嚟講，霸戲哥都係鍾意傳統嘅中式糖水。話時話，去隊番碗紅豆沙先。