霸戲哥之日常#391｜ 直入決賽

認真問，依家係咪唔再叫第六波疫情？確診數字就快破萬，病毒更入侵娛樂圈，繼TVB總經理曾志偉上周確診，近日再傳出有五名候選港姐中招，令原定周日舉行嘅《2022香港小姐競選》準決賽都被迫取消。由於決賽鐵定喺9月25日喺紅館舉行，當晚惟有將準決賽同決賽二合為一，都算係迫不得已嘅安排。

冇咗準決賽，換句話講，就係19位候選佳麗直入決賽，對於冇咁標青嘅佳麗，都未免唔係好事噃。至於五位中招港姐，呢段時間都唔會再安排宣傳同綵排，等佢哋可以靜心休養，亦保障同其他佳麗同工作人員安全。如果咁唔好彩，到決賽當日仍然未好番，就惟有退選，亦會成為史上首位因患新冠肺炎而被迫退選嘅港姐嘞。

今個星期冇港姐睇，TVB就安排特備節目補上，就係播出由蘭茜做「一集獎老」嘅《開心無敵獎門人》，帶領嘉賓梁靖琪、文頌嫻、湯盈盈、周家蔚、鍾麗淇、方力申、吳家樂、黃建東、鄭俊弘及何遠東玩遊戲，陪觀眾笑餐飽。

霸戲哥

** 博客文章文責自負,不代表本公司立場 **

話說噚日霸戲哥打開facebook嚇一大跳，見到高先電影院出咗個緊急公告，稱因突發事故而要暫停營業，直至另行通知。

由於事出突然，仲搞到要退飛，惹來坊間唔少揣測，擔心係咪涉及人為因素，抑或有觀眾或職員中咗新冠肺炎，要閉關徹底消毒。後來搞清楚，原來係大廈爆水渠，導致戲院地板濕滑，經過一日嘅「搶救」，今日已經恢復營業，真係虛驚一場。

高先電影院自上年2月開業，堅尼地城已經成為影迷聚腳嘅地方，雖然影院唔多，但入場率長期高企。霸戲哥身為「黑卡」持有者，不時同豬視妹搭長途車過海睇戲，順便食吓勁好味嘅燒賣。

自從爆發疫情，戲院係首當其衝，高先電影院背後冇大財團支持，經營上就肯定更加困難，惟有靠我哋呢班影迷去支撐住。