魔童王維基真係有橋，最新一招仲係同亞視王征哥傾租用亞視頻道，魔童轉數真係快到得人驚。
當日《巴士的報》爆料話王維基和王征密會傾買起亞視，但由於價錢差太遠，最後不歡而散。一般人有此經驗，以後都唔諗再接觸。點知王維基一個轉身，過完年又搵人向王征的伙計傳話，話想租亞視一至兩條數碼頻道，本來和王維基反咗目的王征，又竟然OK喎，雙方就密斟每條頻道一年1000萬的價錢，去租亞記的頻道。不過王征將呢個建議提上亞記高層會議後，竟然被自己伙計執行董事雷競斌(吔叔)反對，結果就搞出一鑊王征怒炒吔叔。
市場傳傳吓，傳到王維基唔止向王征租亞視頻道，仲傾好將成個亞視買埋。呢個世界乜事都會發生，特別係王征有少少神化，所以乜嘢可能性都不能排除，但牌面睇雙方不易就亞視賣盤達成協議。
不妨分析吓王維基和王征共舞的三個可能性，從王維基角度睇，可分上中下三策。第一是上策，係好平價錢買到亞視。大家留意吓亞視出的通告，特別提到王征家族累計投資在亞視有18.2億，都好少見到啲通告提醒人自己喺呢間公司輸咗幾多錢，王征咁創新，都不外乎想提醒潛在投資者，我投咗咁多錢，唔好旨意我平賣。上次雙王會，王征開價10幾億，雖然只是開價，但估佢最少都要收到10億才願意離場，但王維基只還價5、6億，雙方差距好大。如果王維基用5億買到，若然唔想自己出晒錢，只佔51%，搵到人投資另外的49%，他自己用2.55億就攞到亞視個牌，呢個當然係上策。問題係王征肯唔肯平賣?
第二是中策，租亞記頻道播港視節目。王維基租一兩條亞記頻道，將港視的好節目全數放在這些亞記頻道播出，搶佔市場。王維基放入亞記的頻道，就如放入特洛伊城的木馬，內藏希臘精兵，有需要時就殺出來奪城。觀眾睇慣睇熟亞視頻道播放的港視節目時，到明年若政府不讓亞視續牌，港視就順理成章成為獲取新牌的大熱門; 反過來政府若想讓亞記續牌，若亞記自己製作的節目收視當時仍然是1點、2點，但港視在亞記頻道播放的節目有10幾、20點收視，咁為何讓亞記續牌而不將牌照轉發給港視呢? 所以王維基一年俾亞記2000萬租兩條頻道，兩年才4000萬，都不要講宣傳效果，只係當打兩口棺材釘，都值番呢個銀碼。
第三是下策，貴買亞視。若王維基用9至10億的高價買亞視，即使只佔一半股權，都要用4億幾5億。王維基和人閒聊時提過，不想貴買亞視，係怕明年到期亞視不獲續牌。但知情者話，若王維基買了亞視，佢自信挾港視的聲勢，可以逼到政府續牌，但港視而家手頭現金30億，未來要和無線打硬仗，估計要燒好多錢，所以用10億(或找伙伴合作用5億)去買個亞視牌，耗費金錢太多，留作未來打仗的錢太少，不化算。
講來講去，除非王征願意賤賣亞記，否則王維基租一兩條頻道，放隻木馬入去玩，條數易計好多啦。
盧永雄
財爺鬍鬚曾的預算案一如所料，無乜驚喜，事前充份放料，話為了審慎理財，政府會減少派糖，結果真係減派。從公關的角度應記一功，算是比較成功地消化減少派糖的壞消息。
不過公關過後，回歸現實，減少派糖，中產怨聲最大，覺得政府只照顧基層，不理中產。中國人有句話是「不患寡而患不均」，老外做埋實驗，顯示派嘢派得唔平均的後果，可以先睇睇上面條片(特別看1:34至2:06)，猴子食青瓜本來都OK，但看見另一隻猴子有提子食時，就即刻發爛渣。
雖然政圈中人睇嘢好微觀，講到特首CY和財爺鬍鬚曾一個增派派、一個減派派的分別，但市民大眾未必會睇得咁細，只會夾埋睇一個政府的政策，令人地有何受惠，自己得到什麼。中產看見人地攞綜援的繼續出雙糧，低收入階層又有新的每月津貼，但自己的差餉優惠卻要減半，後生一點的新中產還住在公屋的話，公屋免租由兩個月減成一個月，樣樣都縮，都咪話無意見。
呢個局面政府都知，財爺怕開支太大，覺得前景不是那麼好，要開始減少派糖。但減之餘又怕震蕩太大，所以力度亦調節過，例如公屋免租保留番一個月，不是一下子收晒，退稅額又保持在1萬，仲加番少少供養父母免稅額，盡量照顧中產的感受。
我估這個預算案，捱吓都可以過關。但真正的問題有兩個，第一，未來政府的福利政策會否進一步向基層傾斜，若然如此，小心最後中產都會如上面影片的猴子一樣，來一個大爆發。第二是政府審慎理財減派糖的同時，究竟能夠推動何種產業，帶起那些經濟，令中產及其下一代見到機會，才是最核心的問題。
盧永雄
