霸戲哥之日常#397｜ 黯劇

最近一連發生唔少轟動嘅倫常慘案，引起大眾嘅關注。不過以香港人嘅金魚記憶，隔番一頭半個月就統統唔記得晒。一時間咁多大單案，霸戲哥深信唔係出於偶然，當然唔可以就咁斷定香港危險咗，但社會氛圍、經濟環境、再加上無止境嘅疫情，都會迫到令人情緒爆發，做出不可挽回嘅憾事。

無綫今晚播出新劇《黯夜守護者》，由「亞視同學會」陳展鵬、陳煒同袁文傑孭飛，表面上係一般嘅都市犯罪劇，實情係借案件探討社會深層次問題，揭開人性陰暗面，呢類劇種比較少有，唔知師奶啱唔啱睇呢。

霸戲哥睇完第一集，暫時感覺唔錯，難得係唔再用光燦燦嘅世界燈，色tone亦偏向暗，拍得出都市嘅冷漠同無力感。第一集結尾更加出人意表，至少成功吸引到霸戲哥追看落去。

相信《黯夜守護者》編導野心唔細，至少唔係只睇收視，而係希望觀眾能夠喺劇入面有所反思，拎到嘢走，唔係睇完就算。

霸戲哥

** 博客文章文責自負,不代表本公司立場 **

都有段時間冇見室友J，自從牛精仔出世，室友J做咗湊仔公，連見面食個晏都話冇時間。

霸戲哥真心佩服佢哋，將所有工餘時間貢獻晒畀屋企，自問真係冇呢份責任感。不過就算幾忙都好，人總需要獨處嘅時間，發洩又好，發呆又好，先至有動力繼續向前走。

最近N記有套喜劇《爸爸Me Time》，就係講獨處時間。故事講述奇雲赫特同麥克華堡係識於微時嘅生死之交，每年麥克華堡生日都會約埋一齊慶祝，做啲超蠢嘅事。但之從奇雲赫特有咗家室，再冇能力陪對方「玩命」，兩人逐漸疏遠。到麥克華堡44歲生日，奇雲赫特喺妻子慫恿下，再次參加對方嘅瘋狂派對，人生亦有所改變。

全靠奇雲赫特同麥克華堡兩大影星，令套戲前半段都叫做有啲追看性，可惜去到中後半段無以為繼，劇情大暴走，真係越睇越老尷。作為一齣瘋狂喜劇，《爸爸Me Time》頗有《賭俠大戰拉斯維加斯》feel，可惜笑料硬堆砌，仲要沿用八十年代嘅玩屎玩尿，稍有要求嘅觀眾應該未必收貨。

但正如前文所述，人生總需要獨處嘅時間，用嚟睇呢類冇養份嘅電影最適合不過。