霸戲哥之日常#395｜ 仙魔大戰

今早起身買早餐，霸戲哥留意到一個久違嘅現象，就係班曼迷終於鼓氣最大勇氣，着上塵封嘅曼聯主場波衫遊街，尤以背脊印上C7為最多。你就知今晚又有大戰要上演。

今個星期最觸目嘅英超賽事，當然就係夜晚11點半上演嘅「仙魔大戰」——紅魔鬼曼聯主場迎戰阿仙奴。兩隊波，唔知依家仲算唔算Big 6，但近況一定係最好。曼聯三連勝，阿仙奴就五連勝，套講波佬話齋，今晚一定至少有一隊要終止。

上次雙紅會，霸戲哥提出套後生仔戰略真係work，擺C7後備，由班後生仔死衝死搶，結果人人肯跑多幾步，打窒利物浦道氣。但今仗對住嘅又係後生仔，用同一招似乎未必掂當。

霸戲哥覺得今場勝負關鍵，係點樣壓制馬天尼利同沙卡嘅兩翼側擊。正常領隊慣擺三中堅，再用兩邊二閘協防，但問題係曼聯一來唔慣踢呢個陣，二來唔通出麥佳亞咩！成日話進攻就係最佳防守，如果曼聯加強兩邊側擊，反過來迫番對手要協防，理論上就可以解除對方嘅威脅。所以霸戲哥建議曼聯踼4-3-3，二閘用速度高嘅雲比沙卡同馬拿斯亞，用卡斯米路握守中路，搭住艾歷臣同麥湯米尼一攻一守，前線用福仔、辛祖兩快翼側擊，中鋒以C朗牽制，一於同阿仙奴對攻，乘住主場氣勢打垮對方。

戰術重點係，麥佳亞繼續喺場邊用眼神制敵，咁就有勝算嘞。

霸戲哥

** 博客文章文責自負,不代表本公司立場 **

豬視妹姑媽好有心，每年都送來幾盒月餅，又邀請我哋食餐好嘅做節。早兩日見豬視妹拎住一抽二褦，就知一年容易又中秋。

除咗食月餅、玩燈籠、煲蠟同賞月，中秋節最重要活動係咩？之唔係買六合彩囉！中秋節有金多寶嘛。

《飯戲攻心》宣傳團隊醒呀，居然諗到將電影同金多寶connect，提示觀眾呢套2022年賀歲片，改咗喺中秋節檔期上映。

依家只要購買9月7號開畫日嘅電影戲飛，就可以獲得《飯戲攻心》中秋金多寶大抽獎獎券一張，有機會抽到價值10萬蚊嘅足金金條、價值8萬蚊嘅足金金粒，同埋財神金牌等等。有戲睇又有獎抽，Super啦！

有人話劇組揼本，霸戲哥就覺得都係gimmick嘢嚟啫，反而係誠意可嘉至真。你要知道成個event最麻煩應該係申請博彩牌照嗰part，淨係填form都搞餐懵，仲要同政府部門來回周旋交涉，冇番一頭半個月籌備係冇可能搞得成。

陳詠燊導演一向多計仔，唔知中秋金多寶呢條橋係咪佢度呢？以後過時過節，端午就睇《逆流大叔》，中秋就睇《飯戲攻心》，都咪話唔盞。