霸戲哥之日常#402｜ 喇星正傳

今個星期除咗《飯戲攻心》，其實仲有一套戲好值得留意，就係印度版《阿甘正傳》嘅《打死不離喇星夢》。

戲名叫得「打死不離」，你就意識到又有印度劉華Aamir Khan主演，佢就係扮演印度版阿甘「Laal Singh Chaddha」。奇就奇在班道德L同平機會啲人去晒邊，「喇星」咁俗都過到骨？

電影係翻拍1994年經典，同阿甘故事如出一轍，只係加入咗啲印度元素，多咗浸咖哩味。故事講喇星天生自閉同殘疾，但依然咬緊牙關，跑出人生夢，仲追到埋女神，勵志到呢。

至於大家最期待嘅畫面，好似「Run Forest Run」，同埋金句「Life is like a box of chocolates」梗係喺度，只係前者改做「Run 喇星 Run」，後者就變成「Life is just like a golgappa」而已。Golgappa（酥炸球）係印度著名嘅街頭小吃，由小麥粉製成，中間塞入馬鈴薯泥同埋綠色狀嘅香料混合物，味道都好複雜吓。

唔講唔覺《阿甘正傳》都拍咗接近30年，未睇過嘅可以當新片睇，睇過嘅亦可以當欣賞印度劉華嘅演繹，青春回憶全部返晒嚟。

霸戲哥

** 博客文章文責自負,不代表本公司立場 **

港產片又再揚威海外！由新晉導演曾慶宏執導，毛舜筠、Edan、Anson Lo主演嘅電影《過時·過節》，獲選今屆釜山國際電影節參展電影，10月初喺當地舉行世界首映，導演屆時亦會飛去當地同觀眾見面。

《過時·過節》以親情為主軸，亦探討三代人嘅世代矛盾。故事講述八年前一場「混亂冬至飯局」發生後，各位家庭成員心存芥蒂，自此為食一餐齊齊整整嘅冬至飯都傷盡腦筋。故事係導演受自身家庭經歷而啟發，相信亦係唔少香港人嘅心底故事。

當然套戲嘅焦點，或者會落喺《大叔的愛》拍檔Edan同Anson Lo度，但其實導演一樣大有來頭。畢業於中大新聞與傳播學院嘅曾慶宏，曾任港大客席講師，又喺《明報》「星期日生活」撰寫專欄。2018年，佢憑《下雨天》奪得第12屆鮮浪潮國際短片節「鮮浪潮大獎」及第六屆「張國興傑出青年傳播人獎」。

《過時·過節》將於11月喺香港上映。