劉進圖(Kevin)光天化日下被斬六刀，全城讉責暴力行為。由周三出事到依家，見到佢傷勢穩定落嚟，可以離開ICU轉到私家病房，大家都鬆咗口氣，連日壓力最大莫過於他的太太陳碧君(Vivien)，一直守候在旁的Vivien，今日開腔感謝外界的關心。
Kevin轉病房時，Vivien陪伴在側，互相扶持，患難情深盡現。
出事後，Vivien第一時間趕到醫院，既為傷勢嚴重的Kevin憂心，還要照顧趕到醫院的老人，以及應對眾多友好的關心，有到過醫院探望的人都稱Vivien表現堅強，有佢在Kevin身邊，一定係最大的支柱。
Vivien出身記者，與Kevin的情緣亦係由一齊跑新聞開始，後來Vivien轉戰公關，在貿發局時調任北京高級研究主任，Kevin亦都前往北京出任明報駐北京的主管，婦唱夫隨。駐京兩年後回流香港，Vivien先後喺領匯，之後再跳到九巴，現時係九巴企業事務總監。
正如Vivien所講，Kevin康復之路還很長遠，也不容易，Vivien未來的擔子也不輕，但以她的堅強性格，一定可以陪伴Kevin，走好這條復康之路。
Ariel
** 博客文章文責自負,不代表本公司立場 **
內地美女富豪劉迎霞上周突然被揻柴，冇得做全國政協委員，連什麼全國工商聯會、民間商會、全國青聯，一籮呢啲頭銜都一舖清袋，就快召開的人大政協兩會，少咗個靚女政協醒吓神喇。
呢位美女富豪離奇揻柴事件，內地傳媒愈爆愈多料，原來佢涉嫌行賄，準備拉佢接受調查時，俾佢走咗佬，依家下落不明。之前已經將佢同多名中石油官員的名字拉埋一齊，睇嚟佢都係打油老虎周永康時，外圍的一啲涉案的蝦毛仔。
話說去年劉美人已經聞到燶味，有大半年都話自己身體唔好，去咗美國醫病，有見過佢的朋友話，當時劉美人個樣已「謝謝哋」，計番時間，去年又真係接而連三有中石油官員墮馬，身有屎點會唔知自己大鑊，估計呢啲美女又好，土豪又好，早早就為自己安排好後路，有事就速逃一啲都唔出奇。
不過，原來呢位劉美人風光背後，又真係幾奇情，佢已經發咗達上岸，年少結婚早早就離婚，有個十幾歲的女，諗住搵番個男人拍吓拖迎接第二春，呢個男友都有頭有面，係一領導的秘書。
點知個男人係個花心友，狼到有日同劉美人去按摩就出事喇，話說兩人齊齊入咗間VIP房做健康按摩，劉美人太累瞓著咗，瞓到矇矇矓矓之際，突然見到個男友竟然喺旁邊張床，同個按摩妹搞緊嘢，嘩！唔係啩，咁都得，但劉美人真係分別同幾個不同的閨中密友呻過同一件事，相信都有一定真實性。
後來劉美人就干脆搵咗個冇錢冇權的小白臉，應該係話養咗個小白臉，唔知今次走佬，有冇帶埋一齊呢？
