霸戲哥之日常#414｜ 左膠變硬膠

世上已經冇任何嘢可以阻擋荷里活繼續虛偽落去。盛行嘅左膠風潮不停吹奏政治要正確，連電影娛樂都無一倖免，頗有美國文化大革命色彩。

最新被政治正確「洗劫」嘅文化產物，係你我嘅童年回憶動畫《小魚仙》。話說迪士尼又重拍真人版，近日釋出嘅預告曝光，但我哋熟悉嘅白雪雪Ariel，突然變成黑人歌手Halle Bailey出演，嗰種突如其來嘅反差實在太難令人接受。

迪士尼嘅用意明顯不過，純粹想打破白人壟斷話語權嘅框架，而呢種race swapping嘅手法，近年喺唔同作品不斷出現，好似之前霸戲哥介紹過嘅真人版《木偶奇遇記》，就搵咗非裔女星Cynthia Erivo扮藍仙女，都已經畀人話不倫不類。

成件事根本唔關演員係黑人定白人問題，係本身原角色係白人，做乜多舊魚為改而改？再者，如果唔撐套戲，又係咪等同種族歧視呢？點解係都要將兩樣嘢夾硬綑綁，
呢種極端嘅矯枉過正，其實更有逆向歧視嘅成分。

霸戲哥留名等睇黑人扮嘅白雪公主。

霸戲哥

** 博客文章文責自負,不代表本公司立場 **

你班鹹濕仔有運行啦，今晚J2節目《開壇》，蘇民峰師傅會同大家講「腳相」，三位索女主持倪嘉雯、陳若思同黃嘉雯齊齊自動波熱褲晒腿，奉旨派福利。

人衰行路打倒褪就聽得多，但原來一個人行路姿勢，都會影響運程。好多人自己唔覺，行路「八字腳」同「入字腳」，但旁人見到就覺好礙眼。原來「八字腳」嘅人，係「有外向之心，冇外向之能」，即係成日想做大單嘢，可惜係無能。至於「入字腳」嘅人，性格就比較內向。但呢方面其實後天有得掹，師傅話只要留意多啲自己嘅步姿同改善，性格都會慢慢改變。

另一種「衰相」，就係腳踭唔掂地。師傅話「腳跟不落地，賣盡田園走他鄉」，即係生意失敗走佬格。仲有一等係「蛇行雀躍」，行路扭身扭勢，
有一說法係呢類人多數心術不正，做事有始無終，一事無成。

豬視妹無啦啦隊隻腳埋嚟問「有冇闊太相」。霸戲哥心諗唔使睇節目都知答案啦……