霸戲哥之日常#411｜ 永別大師

噚日突然收到BBC push，法國電影大師尚盧高達離世，享年91歲。

世事往往就係咁橋，晏晝扭開電視，重播緊《阿飛正傳》，張國榮發表佢套無腳雀仔論，而呢句金句並唔係王家衛度嘅，而係出自佢偶像尚盧高達套《不法之徒》。

霸戲哥認識呢位法國電影新浪潮嘅靈魂人物，全因為以前工作嘅戲癡上司，當年成日推薦我睇《不法之徒》同《斷了氣》，當然上面提到「無腳雀仔」嘅小趣事，亦係佢分享嘅。

同戲癡上司共事多年，佢擴闊咗我對電影嘅睇法。後來因工作關係，開始接觸更多法國電影新浪潮作品，好似杜魯福嘅《四百擊》、積葵丹美嘅《秋色伊人》、伊力盧馬嘅《慕德的一夜》咁，仲寫過篇專題講法國電影新浪潮添。

尚盧高達創意無限，鍾意顛覆傳統，所以佢嘅作品都會有意想不到嘅效果。最經典要數《不法之徒》嘅dancing scene，突然拎走配樂插旁白，觀眾仲以為係咪條片有事。

霸戲哥最印象深刻反而係《周末》，其中一幕用一個長鏡，展示大塞車場面。導演本身對中產主義極度反感，佢借汽車比喻消費主義，而長鏡去到尾係車毀人亡嘅畫面，箇中意義顯然而見。

感謝尚盧高達為現代電影帶來衝擊，霸戲哥亦趁呢個機會，向戲癡上司講聲多謝。

霸戲哥

** 博客文章文責自負,不代表本公司立場 **

第 74 屆艾美獎（74nd Annual Primetime Emmy Awards）今日在美國洛杉磯舉行，獲14項提名嘅Netflix劇《魷魚遊戲》，雖然贏唔到最佳劇情類影集，但男主角李政宰就贏咗最佳男主角，成為史上首位奪艾美獎視帝嘅亞裔男演員。最佳女主角就由Zendaya憑《毒癮女孩》第二度封后。

李政宰為亞洲人爭光，霸戲哥梗不過呢個賽果係咪實至名歸，就好見仁見智，網上都有唔少朋友仔戥Bob Odenkirk唔抵，認為佢喺《絕命律師》嘅表現冇得輸，冇乜理由會輸畀李政宰。

平心而論，《魷魚遊戲》的確係好好睇，但你問霸戲哥李政宰係咪做得好好呢，我就覺得普普通通啦，反而飾演佢兒時老友嘅朴海秀，演技仲多一個層次，起碼做到嗰種「唔係你死就我亡」嘅求生意欲。

近年艾美獎嘅公信力同專業性都受到質疑，甚至有人將佢戲謔為某國嘅豬肉頒獎禮添。霸戲哥就覺得獎項嘅嘢冇乜所謂啦，最重要有好劇睇啫。