霸戲哥之日常#417｜ John Constantine

華納兄弟宣佈「將」會開拍《魔間行者》續集，主角John Constantine就梗係搵番奇洛李維斯，因為易角肯定冇人睇，導演就繼續由Francis Lawrence執導。至於「將」係幾時相信冇人會答到，導演手頭上仲有《飢餓遊戲》前傳，同Netflix嘅project喺手，估計最快都要2025年。

唔講唔覺，原來《魔間行者》係2005年嘅戲，霸戲哥當年知道偶像奇哥演John Constantine，特登買咗本英文版小說嚟煲，一睇就對呢個角色愛不惜手，當時仲幫自己改咗個花名做「Honstantine」，諗番起都娘爆。Constantine因為食得太多煙（冇記錯係Lucky Strike）搞到患末期肺癌，搞到為人憤世嫉俗，最記得佢開口埋口「SSDD」，即same shit，different day，依家成為咗霸戲哥口頭蟬。

既然續集未有得睇，惟有去Netflix重溫番舊作先，女主角Rachel Weisz真係靚到癲呀。

霸戲哥

** 博客文章文責自負,不代表本公司立場 **

早兩日霸戲哥落街場踢波，唔知係天氣太熱定對手太young，踢到好似依家嘅C朗咁，冇腳好波又力不從心。睇嚟遲早都要報「老人league」先夠踢。

原來唔止足球有為中坑而設嘅40+聯賽，歌唱比賽都一樣有。無綫最近搞咗個《中年好聲音》招募，邀請35歲以上、對音樂仲有熱誠嘅朋友參加歌唱比賽。招募通告一出，口痕友梗係又指指點點啦，話廣場大媽都可以嚟碰吓運氣。

又唔使吓吓都諗負面嘢先嘅，認真諗其實條橋真係work喎，除咗食到gimmick，最重要係畀到機會中年人圓夢。

好似舊同事C咁，識佢嘅人都知佢歌藝超班，比起嗰班所謂歌星好唔知幾多皮。霸戲哥以前啲惡搞歌，大部份都搵佢去唱，貪佢快靚正之餘，最厲害係佢扮學友得，扮Eason又得，連羅文都難佢唔到。

如果舊同事C參加，霸戲哥肯定瞓身支持。