博客文章
港產片繼續傳來好消息！由陳心遙監製、曾憲寧執導嘅電影《燈火闌珊》，剛入圍第35屆東京國際電影節「亞洲未來」競賽單元，10月中會喺東京舉行全球首映。
電影由張艾嘉、任達華、蔡思韵同周漢寧主演，以本土味濃厚嘅霓虹燈光為主軸，表面上係一個愛情故事，側寫一座城市嘅衰落同集體回憶嘅消逝。
五光十色嘅霓虹燈牌，係香港獨有嘅文化符號，喺油尖旺一帶，由於人口密度高，商舖林立，商家為標奇立異，霓虹燈牌應運而生。呢啲招牌唔止
展現出動感同活力，亦記載住八、九十年代香港曾經繁華嘅景象。
可惜，盛極而衰係必經階段，港府逐步收緊建築物條例，令呢啲霓虹燈牌冇得留低，再加上冇新人願意入行整霓虹燈牌，呢門咁獨特嘅手工有朝一日都會流失。
可能過多三五七年，霓虹燈牌永久成為歷史，後世人只能夠喺電影入面緬懷佢哋曾經輝煌嘅過去。
霸戲哥
** 博客文章文責自負,不代表本公司立場 **
邊個話中秋節一定要食月餅？食薄餅又得唔得先？點解，事關豬視妹噚晚睇咗集Netflix嘅紀錄片《主廚的餐桌：披薩》，心思思想叫番個薄餅嚟食食。
《主廚的餐桌》十足鬼佬版《滿足的味道》，喺N記已有一定名氣，而呢個series共六集，題材當然係圍繞Pizza，但探討主廚嘅成功人生，其實先係主菜。
講到Pizza，人人都話自己係Pizza之王，但邊度先最堅？Pizza來自意大利拿坡里（另一說法係來自中國，詳見電影《摩登如來神掌》），屬低下階層食物，意大利人對Pizza極之講究，絕對唔容許加入菠蘿做配料，寧願餓死唔食。
講究還講究，好食還好食，睇完節目，有說全球最好食嘅Pizza，可能係亞利桑那州鳳凰城嘅Pizzeria Bianco。創辦人Chris Bianco知道要做好食嘅Pizza，只得一個秘訣，唔係水質、唔係烹調溫度、唔係煮法，而係食材嘅質素。佢做pizza嘅用料，由蕃茄、芝士、香料以至麵粉，都由Chris親自挑選，基乎每個pizza都由佢嚟主理。亦因為咁，Pizzeria Bianco開業冇耐已打響名堂，每日慕名前來品嚐嘅食客大排長龍，而Chris亦間接推動當地嘅Pizza文化，Pizza之王當之無愧。
香港都有好食嘅Pizza店，銅鑼灣就有一間，可惜屋企附近都係嗰啲連鎖店，冇計，頂住肚先啦。
