今個星期冇英超唔緊要，因為有港姐睇都夠做，話晒50周年紅館豪搞，有幕歷代港姐一齊盛裝上台，實在壯觀。最厲害係個個雖然有番咁上下年紀，都仲keep得好好，可惜今日嘅香港已經唔係以前嗰個。
點睇賽果？霸戲哥都覺得正路吖，8號林鈺洧之前個樣普普通通，今晚的確特別靚，拎冠軍合理。至於亞軍4號許子萱同季軍14號梁超怡，今晚發揮都出色，可能身形輸蝕少少，得唔到評判歡心。個人認為，4號許子萱喺泳裝問答環節「衰擦鞋」，嗰吓真係扣晒分，唔係應該佢拎冠軍啦。
見唔少人話2號林曉彤冇理由入唔到五強，霸戲哥都覺得可惜，但亦係TVB嘅「正常操作」。以歷屆往績，通常最靚最甜嗰個都贏唔到冠軍，但往後喺TVB一樣會有唔錯嘅發展，所以都唔使擔心佢會就此「失蹤」。
今年TVB花錢大搞港姐，又搵歷代司儀撐場，睇得出好有誠意，不過都有唔少嘢可以改善。譬如panel可以做好少少，一開場都幾混亂，同埋遠近shot接得有啲怪。另外個rundown都少少奇怪，霸戲哥同豬視妹都唔明點解會頒咗最上鏡小姐先出泳裝，又有啲佳麗冇機會着泳裝。唔通真係怕咗余黎青萍？
Anyway，恭祝林鈺洧、許子萱、梁超怡喺今後有好嘅發展，延續港姐美貌與智慧嘅傳奇。
霸戲哥
** 博客文章文責自負,不代表本公司立場 **