博客文章
今年係無綫成立55周年，今日喺電視城舉行亮燈儀式，宣佈嚟緊有咩台慶劇同新節目。久違嘅大堆頭合照重現，相信疫情都就快告一段落。
無綫呢輪個氣勢係幾勁，幾套黃金檔劇《痞子殿下》、《白色強人II》、《夢華錄》同《黯夜守護者》都有唔錯收視，梗係想乘勝追擊。嚟緊四套台慶劇分別係《美麗戰場》、《下流上車族》、《第四十二章》同《超能使者》。霸戲哥暫時最期待係《下流上車族》，因為想睇靚女郭柏妍嘛。
至於J2都有新節目推出，分別係由何泳芍、廖慧儀、胡美貽、陳若思主持嘅《港女野人》，同埋由賴慰玲擔任導師嘅戀愛真人騷《CP訓練營》。
睇個勢，嚟緊呢兩個月都要黐實部電視嘞。
霸戲哥
** 博客文章文責自負,不代表本公司立場 **
近年電影院線為爭奪市場佔有率，紛紛各出奇謀，譬如舉辦專題電影嘅放映咁，偶爾都有意想不到嘅斬穫。
MCL院線嚟緊就會搞個名為「人間煉獄.獸慾橫流2:誇世代港產cult片選」嘅專題放映，顧名思義係選播13套經典港產cult片，當中唔少得嘅有牟敦芾嘅《打蛇》、藍乃才嘅《力王》同邱禮濤嘅《伊波拉病毒》等等，映期由下月28日至11月26日，主要喺K11 Art House同又一城Festival Grand舉行，部份場次仲有座談會，真係未放映，先興奮。
霸戲哥以前寫電影專題，都接觸過唔少呢啲cult片，仲充當權威咁幫佢哋排名，幾咁唔要面。而咁多套之中，印象最深始終係《力王》。幾年前有個project，一直想約藍乃才導演做訪問，仲喺微博到成功聯絡上。可惜導演愛上周遊列國，早已不問影壇事了。
唔知有冇機會喺座談會到見到佢呢？
