霸戲哥之日常#429｜ 風再起時

今日啲風特別旺，今朝先寫完《暴風之年》，晏晝就傳來影壇好消息，由翁子光執導，霸戲哥偶像郭富城、豬視妹偶像梁朝偉，兩大影帝聯手主演嘅電影《風再起時》，將代表香港角逐第95屆奧斯卡金像獎最佳國際影片，亦係史上第五套香港作品角逐該獎，前四套分別係張藝謀嘅《大紅燈籠高高掛》，陳凱歌嘅《霸王別姬》，王家衞嘅《一代宗師》，同埋曾國祥嘅《少年的你》。

《風再起時》以「四大探長」事跡為題材，郭富城飾演「磊樂」（呂樂）探長、梁朝偉飾演「南江」（藍剛）探長、譚耀文飾演「嚴洪」（顏雄），周文健飾演「肥B」（韓森）。鍾意港產片嘅讀者，對四大探長嘅故事絕對唔會陌生，但以翁子光嘅視嘢，相信會拍出一個唔同嘅角度同視野。

早前《風再起時》喺香港國際電影節首映，門票極速售罄，有幸觀摩呢套戲嘅人唔多，霸戲哥同豬視妹梗係心急想睇啦，不過暫時呢刻都未有確實映期。但可以肯定嘅係，港產片呢浸強勢仍然會持續一輪。

霸戲哥

** 博客文章文責自負,不代表本公司立場 **

鍾意港產片嘅香港人，都應該睇過古天樂套《明日戰記》，至少一次。套戲暫時累積票房6200萬，過埋呢個weekend，有望趕過6240萬票房嘅《梅艷芳》，距離史上華語票房冧把溫、6682萬嘅《寒戰II》越嚟越近。

不過眼前嘅票房成績對於古生來講，其實都好似要，事關拍攝成本咁高，回唔回到本都成問題。但套戲贏返嚟嘅口碑係無價，後續嘅收益，無論係拍續集又好，賣figure又好，都肯定和味。

結果不出霸戲哥所料，《明日戰記》將會開拍前傳，仲要係全動畫電影，而重中之重，當然係香港人班低製作。

古生最厲害嘅地方，唔單止係識得包裝，同埋擁有超強嘅洞察力，而係有為下一代着想。佢呢個30年嘅科幻大計並唔係一味靠吹，而係實實在在咁一步一步實踐。

古生已經為香港電影嘅未來打好晒根基，所以我哋香港人都要爭氣。