蒯轍元諗過搞上市

因為搞報紙事件而惹人注目的左派人士蒯轍元，原來不止活躍評論政治，早兩年仲一度想搞公司上市。

同財經界人士傾偈，有位朋友竟然識得蒯轍元，佢話蒯轍元當年已經同搞《新晚報》的夏萍玩埋一齊，仲想搞上市咁話，呢位朋友仲同佢地兩個一齊開過會。

原來蒯轍元和夏萍一直有搞華商雜誌，每年又搞華商領袖獎，跟手又搞華商領袖網，呢啲頒獎禮當然都係有生意眼的活動，而佢哋當時力推個華商領袖網，叫人入會俾50萬、100萬會費，仲話會員全部好有身份地位，入咗會可以接觸到李超人呢類猛人，有乜建議書可以放到這些猛人的郵箱咁話。

佢哋當時搵咗海通證券幫手，想話將華商領袖網呢堆業務，包裝上市，希望集到10億咁話(係10億，唔係寫錯呀)，若然以發25%新股集資10億咁計，即係成件嘢要估值估到40億! 呢啲咁虛幻的東西，想集資10億，當然難度極高，最終都係搞唔掂。咁佢地就搞出一份《新晚報》，覺得搞免費報紙實質啲，若然搞得掂當然可以上市啦。

不過《新晚報》搞咗兩年又唔係幾掂，最近又話變收費報唔知想點。不排除有人諗頭多多，又有新概念睇試吓搵唔搵到老細支持囉。不過香港報業競爭得咁厲害，想搞報紙真係一啲都唔易啦。

Ariel

** 博客文章文責自負,不代表本公司立場 **

劉進圖喺日光日白下被斬事件，全城譴責，首當其衝感受衝擊的新聞界，破天荒聯手，五個新聞組織：香港報業公會、香港新聞行政人員協會、香港記者協會、香港新聞工作者聯會、香港攝影記者協會發起，多個團體參與，組成反暴力聯席，發起大遊行。

傳媒界紛紛響應，齊集公民廣場。遊行開始前，近十架的士和小巴慢駛經過公民廣場前，司機在車身貼上「撐新聞自由，反暴力襲擊」的字樣，司機叔叔們如此有心，平日cool cool地，以理性冷靜為座右銘的老總小記們都為之感動，掌聲齊起！

第一次見到不同政見的組織一齊舉行橫額遊行，場面都有啲令人感動，不少離開新聞界的前輩都現身支持，場面固然難得一見，但有新聞老行尊不禁慨嘆：這樣的集會，這樣的遊行一次也嫌多！(我哋都唔想再見到有新聞人受暴力威嚇。)