電影《美國隊長：英雄內戰》票房勁收得，片中兩大陣營領袖「美國隊長」同埋「鐵甲奇俠」各有支持者。膠仔比較鍾意「鐵甲奇俠」，佢套戰甲真係太有型，而呢套戰甲嘅主要動力來自「東尼」心臟安裝嘅核反應爐。不過電影還電影，現實又有無可能出現真正嘅核動力心臟呢？《Business Insider》記者翻查資料，發現早喺1967年，美國有兩批科學家試行研發「核能心臟」，最終因為幾個無法解決嘅問題，計劃告吹。
心臟病多年嚟都係美國頭號殺手，好多科學家同病人都覺得，「如果能夠有個可以替換嘅心臟就好啦」。1967年就有學者建議「發明一個用核能嘅人工心臟」，仲提供好多論證話可行。美國心臟研究所同埋國際原子能機構就根據呢啲資料，分別展開為期十年嘅研究。
雖然理論上可行，但係研發核能心臟面對好多挑戰，第一步要製造一種唔會被人體排斥嘅機械泵，仲要有一套安全機制將熱能轉換成動能。但係經過幾年研究，兩班學者嘅實驗作品唔係太笨重就係好易過熱，更大問題係無法控制輻射線。研究員認為，人體長期受核輻射影響，一定會導致更多疾病，甚至連病人一齊住嘅家人都受牽連，唯有放棄用核能啦！
雖然放棄用核能，不過科學家並無放棄人工心臟。直到現代，仲有好多生物科技公司埋首研究，大方向係靠人體生物能量發動人工心臟，不需電池或外力，目前仲未有生產商合要求。至於現有嘅人工心臟，主要作用係延長病人生命，維持心臟起搏，直到佢哋等到適合心臟移植，全部都要用電池。
相關報道：
http://www.businessinsider.com.au/artificial-hearts-fueled-by-radioactive-decay-2016-5
神州快訊
** 博客文章文責自負,不代表本公司立場 **
人有七情六慾，開心會笑，傷心會喊，好似係人之常情。不過大家又有無諗過其實眼淚係種奢侈品？
荷蘭應用科學研究中心2011年發表過一份報告，指出人類失控痛哭都有文化差異。一個地區愈發達，民眾愈常哭泣。澳洲同美國男性比起其他地區更愛哭，尼日利亞同保加利亞等地男性最少流淚；瑞典女士超敏感，尼泊爾同埋加納女性表現冷酷得多。
研究員當年結論係，哭泣其實係唔係一個悲慘嘅標誌，反而係一種「特權」。發達地區民眾可以因為工作碰釘流淚，落後國家嘅人卻因為戰爭、貧窮同埋社會不公等原因，練成鐵石心腸。報告慨嘆終日飽受飢荒同埋戰爭逼害嘅人，通常較易明白哭哭鬧鬧不能解決問題。
近年敍利亞局勢立立亂，世界糧食計劃署特別喺約旦設立分部應對危機，由聯合國特使Dorte Jessen出任部長。Dorte過去十幾年都喺北非同埋中東等地處理難民問題，見過無數對眼睛因為苦難而再流不出一滴淚。佢喺一節備忘中寫道：
「2011年非洲索馬利亞半島大飢荒，我身在肯雅達達阿布難民營中，見到一位母親同兩個幼童領取緊急糧食。母親動作非常利落，一手扯開其中一個袋遞向孩子。其間母子間不發一言，臉上無任何表情，似乎早就慣咗呢種生活方式，已經麻木。當人筋疲力竭嘅時候，情緒已經變成一種奢侈品，沒有一絲多餘氣力喊。」
活在幸福國度嘅人較易喊得出。地球上仲有好多好多地方，尚有好多好多人，日子艱困得連激動嘅氣力都無。膠仔希望大家曉得珍惜動容時刻，感謝傷你嘅人帶來保護你嘅人，更重要係守護一啲核心價值，踢走逼害同埋不公義，以免社會愈變愈差。
希望你我臉上，都係幸福感動嘅淚痕。
資料來源：
1）荷蘭應用科學研究中心2011年報告：Culture and Crying
2）Science of Us：Tears Are a Luxury Item
