博客文章
最近留意到唔少人讚劉嘉玲越老越靚，60歲嘅梁朝偉又何嘗唔係越老越型！
噚日偉日飛去韓國首爾，出席第27屆釜山國際電影節，領取亞洲電影人獎。着住白色醒神西裝襯黑色西褲嘅佢，喺紅地毯上笑容滿面，又不停同記者朋友揮手，咁親民，唔怪得豬視妹咁嗒佢糖啦。
今次電影節為咗隆重其事，特登舉辦咗個偉仔作品展，喺佢從影40年以嚟揀出6部代表作嚟播映，分別係《射鵰英雄傳之東成西就》、《春光乍洩》、《暗花》、《花樣年華》、《無間道》同埋《2046》。聽聞呢六部都係偉仔自己㨂嘅。
霸戲歌奇怪點解唔揀《色，戒》呢，明明韓國人應該好鍾意湯唯嘛。
霸戲哥
** 博客文章文責自負,不代表本公司立場 **
最近TVB搞咗個才藝表演節目《全城一叮》，成個setting同之前嘅《殘酷一叮》類似，唔同嘅係參賽者全部都係TVB藝員，素人如屯門娜娜同Happy伯就要過主嘞。
去得參加比賽嘅藝員，老實講，唔會係一線二線啦，但唔代表節目冇睇頭。相反，正正係呢班默默耕耘嘅藝員，先至會珍惜上台表演嘅機會，哪怕只有半分鐘，起碼都有spotlight。亦因為咁，佢哋嘅表演往往有意想不到嘅驚喜。
今次掌握生殺大權嘅，係現場觀眾，佢哋手上嘅叮叮可以更加冷酷無情。所以呢班藝員要更加努力表現自己，唔好白白錯失良機。
好似前晚出場嘅「孖八」李俊華咁，原來係舞林高手，為咗今次演出，明顯有充足準備。
孖八一直被安排做路人甲角色，唔講唔知喺《愛回家》度出現過。希望今次之後有更多人留意到孖八啦。
