霸戲哥之日常#449｜ 偉仔玩魷魚

豬視妹偶像梁朝偉早排飛去韓國出席釜山國際電影節，領取亞洲電影人獎。難得出埠唞啖氣，梗係把握機會見吓五湖四海嘅影視界朋友。其中一位，就係人氣劇《魷魚遊戲》導演黃東赫。

見面合照post IG其實好平常，之但係劉嘉玲喺留言度加句「Ready for 《Squid Game》？」、「Let's play Squid game！」就好唔同嘞。唔通偉仔準備拍《魷魚遊戲2》？如果係真嘅話，真係天大喜訊囉！

偉仔其實都喺公開場合放過風，話想參與韓國嘅影視製造，但首先要解決語言嘅問題，聽落唔似客套說話噃。翻查資料，偉仔又好似冇乜同過韓國人合作，印象中就好似只有《一代宗師》嘅宋慧喬咁大把。

唔好睇少社交平台嘅威力，好似尋日卡斯拿斯疑被黑客入侵，喺Twitter度自爆「中途轉gay」，都引起全球哄動。有啲嘢吹吹下，話唔定都會變成真。

霸戲哥

** 博客文章文責自負,不代表本公司立場 **

第一次聽塞內加爾呢個名，一定係2002年世界盃，第一場分組賽超級爆大冷以1:0擊潰衞冕冠軍法國。之後大家已經知道非洲雄師，唔淨止得尼日利亞同喀麥隆兩隊，仲有隊叫塞內加爾。

通常一個國家喺某項運動取得成功，都會投放資源重點培訓精英。尤其係非洲嘅發展中國家，好多細路自細就接受地獄式訓練，只要喺運動取得成績，就能夠脫貧。

不過，塞內加爾最熱衷嘅運動，竟然唔係足球，係塞內加爾摔跤（Senegalese wrestling）。呢種摔跤拳摔並用，將對方摔到為之勝出，唔同嘅係入面有好多古靈精怪嘅宗教儀式，如選手出賽前會用五顏六色嘅「符水」淋身（但用膠水樽），聲稱會有巫術加持喎。

最近喺Netflix上架嘅紀錄片《人間遊樂場》，其中一集講到呢項競技，探討人類為乜咁辛苦去鍛練自己，甚至連條命都可以唔要，背後原因都係一個字——錢。