霸戲哥之日常#460｜ 噬謊者

最近Netflix靜咗排，好似冇乜好戲睇，而暫時熱播電影排首位嘅，係日本電影《噬謊者》，見佢短短哋個零鐘，姑且click入去睇睇。

套戲又係日本仔最愛嘅漫畫改編真人版電影，劇本都唔使寫，慳水慳力。故事主人翁斑目貘（橫濱流星）係天才賭神，精通各種賭術之餘，最叻其實係睇人眉頭眼額，一眼睇穿敵人心理，所以又被稱之為「噬謊者」。某日斑目貘遇上欠債廢青梶隆臣（佐野勇鬥 ），斑目貘聲稱可以幫對方還清債務，兩人就踏上亡命嘅賭博之旅。

有人話《噬謊者》橋段有啲似《賭博默示錄》，霸戲哥反而覺得更似《賭俠1999》嘅setting，都係「阿King」帶住「化骨龍」招搖撞騙，喺賭枱上懲治啲壞蛋。至於擔任花瓶角色嘅，係索女白石麻衣，佢扮演黑幫大家姐鞍馬蘭子，可惜略嫌密實咗少少噃。

套戲話就話係燒腦電影，但喺賭枱上鬥智鬥力嘅場面唔多，反而花太多時間去鋪排人物角色，可能驚觀眾同霸戲哥一樣，冇睇過原著啩。

整體嚟講，套戲又唔係外界講到咁差，用嚟消磨時間一流，不過如果要揀，霸戲哥都會揀番《賭俠1999》囉！

霸戲哥

** 博客文章文責自負,不代表本公司立場 **

最近唔少人討論J2真人騷節目《港女野人》，霸戲哥梗係知醉翁之意在睇女啦，但睇女之餘，都有嘢落袋。尤其見班女喺「港女育成計劃」不斷挑戰同突破自己，都會覺得好鼓舞。

好似噚晚嗰集，Nicole同Amber要挑戰攀岩同沿繩下降。講真，莫過話兩個妹妹仔，就算你叫霸戲哥挑戰都淆淆哋，雖則有晒教練傍住，又有晒安全措施，但望住身後嘅懸崖，硬係凝住會碌落去，到時渣都冇得剩。

Nicole點睇都係sharp醒嗰位，一馬當先就爬到上頂，嬌小玲瓏嘅Amber，個膽一樣係小，攀到一半半天吊唔上唔落，一時話冇力，一時懶腳短，講到尾都係畏高啫。好在Nicole都算有義氣，主動攀上崖協助Amber，先勉強爬到上頂，劇組先可以準時收工。