霸戲哥之日常#462｜ 餘命10年

人總有一死，說得容易，但如果你有絕症，只知最多10年命，面對死亡，又會唔會睇得咁開？

聽日上映嘅日本電影《餘命10年》，故事講述20歲少女高林茉莉（小松菜奈） 患上絕症，忍心放棄七情六慾，唔再對世界有任何留戀，令自己死得好過啲。偏偏呢個時候，遇上生無可戀嘅舊同學真部和人（坂口健太郎），譜出一段未開始已知會終結嘅愛情故事，重新確立生命嘅意義。

電影改編自已故作家小坂流加嘅同名小說，小坂流加患有罕見病「原發性肺動脈高血壓」（PPH），心肺功能只會越來越差，藥物只能夠延長壽命。作者將將自己對生命嘅態度同情感傾瀉喺故事之中，令套戲比一般催淚電影更加實在。最可惜係，小坂流加等唔到小說出版同電影推出，已經喺2017年離開人世。

無論你係貪生定戀死，都好應該入場睇呢齣戲，或者睇完會有所啟發。

霸戲哥

** 博客文章文責自負,不代表本公司立場 **

無綫問題遊戲節目《答得快好世界》今晚去到最後一集，「東張西望隊」（一蚊Joe、黎寬怡、梁麗翹、陳庭欣）殺入決賽唔出奇，但有「豬隊友」馮盈盈坐鎮嘅「之唔係港姐隊」（馮盈盈、鄧卓殷、葉蒨文、鞏姿希）都居然入到，霸戲哥同豬視妹都跌晒眼鏡。

之前重溫咗唔少TVB經典遊戲節目，好似《江山如此多FUN》、《智在必得》、《溫故知新》等，壓軸呢集就係汪明荃、梅小惠同江欣燕主持嘅《電視大贏家》，講開又講，好似好耐冇喺電視機前見到梅小惠噃，都幾令人期待嘅。

冇記錯《電視大贏家》呢個節目喺1997年播出，斷估當年霸戲哥要應付會考，冇乜點睇電視，對呢個節目印象唔太深刻，但玩法顧名思義，都係問番關於電視節目嘅問題，電視精如豬視妹實識答。

大家估吓最終變隊會成為終極大贏家？霸戲哥重注「東張西望隊」。