博客文章
以往幾年，利物浦對曼城嘅強強對碰，都係每季英超嘅焦點，事關戰果隨時會左右到邊隊拎冠軍。之但係今季利物浦開季戰況低迷，暫時喺積分榜排第11位，仲後過兩隊升班馬富咸同般尼茅夫，咁仲算唔算「強強戰」呢？
講吓笑啫利迷，無論利物浦開季點衰都好，佢始終都係一支強隊，今晚主場對住曼城，一定唔會好似其他球隊咁，龜縮泊大巴死守。雖然文尼離隊，三叉戟斷咗一叉，但費明奴今季狀態回勇，多次上演一人救全家。如果激活埋其他隊友，成隊波隨時踢高幾班。所以話，呢場波唔係一面倒冇得踢嘅。
不過呢，曼城入球機器夏撚實在太可怕，當今世上唔知仲有邊個守衛mark得住佢，即管睇吓雲迪克可唔可以。而霸戲哥玩緊嘅Fantasy PL，始終好唔爭氣咁captain咗夏撚。冇計，佢實在太屈機啦！
霸戲哥
** 博客文章文責自負,不代表本公司立場 **
TVB最近推出全新問答遊戲節目《答得快 好世界》，由張秀文同鄭衍峰做主持。其實都唔算得上「全新」，啲問題遊戲其實係取材自TVB歷年嘅問答遊戲節目，好似《15/16》、《江山如此多 FUN》、《智在必得》、《全港至叻星》、《温故知新》、《勝在夠開心》、《DO 姐有問題》同《電視大贏家》。「全新」只不過係主持配答，同埋紅白配襯得幾靚嘅backdrop。
雖然啲遊戲略嫌「炒冷飯」，但勝在有集體回憶，尤其可以見番當時嘅元祖主持，好似《溫故知新》嘅莫鳳儀、《電視大贏家》嘅汪明荃、梅小惠同江欣燕、《勝在夠開心》嘅韓馬利同李有毅，TVB今次算係有啲心思。
霸戲哥最想睇嘅梗係《江山如此多 FUN》啦，記得當年細細個以為自己讀過幾年書就牙擦擦，上至天文下至地理無一不曉（以為），結果一見啲歷史題目深到不得了，同霸戲媽你眼望我眼，然後好有默契咁唔出聲，又下一題。
話時話，《江山如此多 FUN》首主題曲都係好洗腦，時至今日霸戲哥仲唱到幾嘴。豬視妹應該就嚟搵膠紙封我個口。
