遊行大對抗升溫

中央港澳協調小組組長張德江今日展開3天訪港行程，民間人權陣線、社民連支聯會等組織，將於明早8時展開遊行，預計會在會展附近，和警方展開大對決。

民陣明早搞遊行，將會從灣仔修頓中心出發，目標是張德江活動場地灣仔會展中心，話會嘗試向張德江遞交請願信。由於會展附部署了過千警力，防止出現年初二的掟磚暴動，不會俾遊行者接近會展，以防一舊磚掟向領導人，警方的防線會設在外圍，預計難免出現警察和示威者大打出手的情況。

另外民陣明晚會搞集會，地點在警方指定的灣仔公眾活動區、即中環廣場旁的菲林明道花園，集會已獲警方發出不反對通知書。雖然集會較遊行出事的機會低，但警方都不敢掉以輕心。

社民連主席吳文遠亦預備多項抗議行動，但拒絕透露詳情，預計會在張德江出席活動的沿線狙擊他。 今次警方對張德江訪港嚴密佈防，灣仔附近的中環灣仔繞道工程亦要停工幾天。有批評認為警方甚至特區政府過份緊張，影響張德江訪港的氣氛。

不過政壇八卦友就話，講就好容易，做就甚艱難。年初二暴動警察被掟穿頭，事後被批部署不足。若然今次有大量示威者衝擊會場，有人成功突破防線，衝入會展，或者衝到張德江車隊附近，用一塊石頭甚至一個汽油彈，掟中張德江專車，你話呢個鑊邊個孭? 你睇美國為領導人佈防，警力仲大呀。

Ariel

** 博客文章文責自負,不代表本公司立場 **

中央港澳協調小組組長張德江訪港， 18號晚舉行晚宴，泛民議員拒絕參加。後來在晚宴之前再加插40分鐘的酒會會面，泛民四個代表都同意出席。

知情人士分析，中央此舉係唔想香港太對抗，希望有和諧氣氛，見到泛民以「齋食飯無交流」拒絕出席晚宴，就加插這場會面，等大家有機會面對面溝通，都顯示咗相當的誠意。

泛民人士對中央伸出的橄欖枝，開頭都唔知點回應，例如泛民的飯盒會召集人何秀蘭，上周四話酒會都唔會參加，後來又話知道酒會有40分鐘咁長，只係20多人出席，就轉態話參加。

政壇高人話，呢個都算係好開始，至少中央要員首次同泛民的黨派代表接觸。不過佢就覺得相當奇怪，因為泛民始終只願意出席酒會，唔出席晚宴，但當日拒絕出席晚宴的原因是話見中央領導無得溝通，而家都已可以溝通，點解仲唔出席晚宴呢？

可能有人話晚宴係聯誼情質，泛民出唔出席都無所謂。高人話有時雙方的溝通都講求良性互動，你尊重我，我尊重你，如果溝通得好，未來就向良性方向發展。溝通得唔好，不歡而散，來來又會走向對立的地步，所以唔知泛民中人有冇考慮呢點，否則無理由繼續堅持不出席晚宴。