台慶劇《下流上車族》都算威威，威到主角林敏驄、江美儀同鮑姐上埋《東張西望》踩場，聲稱套劇收視已經超越對方。
《下流上車族》收視咁勁，絕對係計算過，套劇食正港人上車夢條水，咁啱上星期特首又發表《施政報告》，大篇幅提到土地同房屋政策，人人八卦想知「簡約公屋」點簡約法同點申請到，你我一個二個車志明上身。買唔到樓嘅可憐蟲，就只有睇住車家點樣為上車奔波圍爐取暖，自娛自憐自嘲完，聽朝又要準時返工。
講開又講，啱啱嗰隻出埋「超必」，安排郭栢妍同羅毓儀cosplay女僕跳御宅藝舞蹈，收視好難唔爆啫。劇情講到兩姊妹去女僕cafe兼職搵快錢，成班連登仔一早捕住電視見圖就cap，都算係近期一個創舉。
《下流上車族》暫時播咗六集，主要角色都仲未好下流啫，唔知播到幾集又有啲咩下流嘢，可以刺激更高收視呢？
霸戲哥
** 博客文章文責自負,不代表本公司立場 **