霸戲哥之日常#464｜ 睇戲傳說

久唔久就會聽到有啲都市傳說，話有觀眾睇睇吓戲心臟病發，最經典要數《午夜凶鈴》，亦因為當時互聯網未發達，事件真確性無從稽巧。後來唔少恐怖電影都沿用呢種宣傳伎倆，用濫咗，霸戲哥開始唔太信，心諗邊有咁恐怖呀？

最近外國又有套呢類嘅戲叫《Terrifier 2》上映，由Damien Leone執導，亦係2016電影《Terrifier》嘅續集。呢類低成本小眾電影未聽過唔出奇，但因為套戲極度恐怖同血腥，居然成功引起外界關注。套戲成本25萬美元，迄今已斬埋250萬美元，名副其實刀仔鋸大樹。

據探子回報，有人睇睇吓戲反白眼暈低，要由白車抬走；有人頂唔順中途離場；有人連洗水間都唔敢去，因為門外嘔吐聲音已經此起彼落。睇過戲嘅人都話呢啲「賽後報告」千真萬確，唔係一般嘅宣傳套路喎。搞到霸戲哥都好好奇想去觀摩一下。

唔知香港有冇發行商睇中咗呢部戲呢？

霸戲哥

** 博客文章文責自負,不代表本公司立場 **

開心時間過得特別快，J2節目《港女野人》原來去到最後兩集，睇住四位港姐由姐手姐腳嘅港女，慢慢升呢進化成山系野人，就算掟佢哋去荒山野嶺都生存到，真係好勵志。

嚟到結局篇，梗係要打final boss，就係以有限資源撐過兩日一夜嘅野外求生。不過佢哋出發前已經遇到阻滯，任務要求四人用繩同水筒等物資，喺半粒鐘之內紮起一艘木伐去荒島，玩吓手中途沉船就邊度都唔使去。

流落荒島，就要緊記「3的定律」：3秒內維持正向思維；3分鐘內維持正常呼吸；3小時內搵到shelter同保溫；3天內搵到水源；就有機會撐到3個禮拜。講就容易，都實戰淨係時刻維持正向思維都好難啦。

即管睇吓四位野能唔能過通過考驗。