霸戲哥之日常#476｜ 珍奇櫃

臨近萬聖節，Netflix都推出咗唔少應節嘅影集，其中由金像導演Guillermo del Toro主理嘅《珍奇櫃》，最吸引到霸戲哥嘅注意。

《珍奇櫃》由八個獨立單元故事組成，包裝手法有啲似《金宵大廈》，當然製作規模大好多啦。佢同傳統恐怖片嘅佈局好唔同，嚇你嘅唔係毛骨悚然嘅鬼怪，而係透過講故仔去探索人類嘅貪婪、傲慢、嫉妒同偽善，迫大家正視心入面嘅惡魔。咁樣其實比兜口兜面嚇你嘅jump scare恐怖N倍囉。

就以單元《36號拍賣品》為例，霸戲哥睇完到呢家，個心都仲係好唔安樂。故事講述一個中年潦倒憤世嫉俗嘅退伍軍人Nick，靠轉賣死人遺物還債，有次畀佢執到幾件古董，其中一件仲張通靈枱，入面收藏三本奇書，賣晒已經幾乎夠佢還債。好衰唔衰個買家同Nick 講，原來可能仲有本奇書《聖禮》，搵到可以賣30萬。貪念起嘅Nick結果被惡靈纏上，最後連命都冇埋。

Nick原本用勞力、膽色同運氣換取酬勞，本應天經地義，錯就錯在佢貪得無厭。呢個故事教訓大家，凡事得些好意須回手，有錢都唔應該賺到盡。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。