霸戲哥之日常#481｜ 群雀亂舞

大埔名物小白鷺最近搬竇，每臨近日落，就會喺林村河上空上演一幕百鳥歸巢群雀亂舞嘅場面，超級壯觀。

雀仔群飛，英文叫Murmuratuon，係一件好神奇嘅事，佢哋有比雷達更精準嘅定位同溝通，就算成千上萬嘅雀仔急轉同一方向，都唔會炒車。呢種近乎超自然嘅力量，古人將佢當成向神傳達禱告嘅神蹟。

點解霸戲哥無啦啦講雀，係因為睇咗Netflix《珍奇櫃》其中一個單元《The Murmuring》有感而發。故事講述一對雀鳥專家夫婦，去到偏遠郊區拍攝雀鳥生態，就住進一座古宅。妻子Nancy專注研究雀仔，疏忽咗老公Edgar嘅需要，後來先知原來女兒死咗冇耐，兩夫婦仍然活喺傷痛邊緣。

面對喪女傷痛，男人同女人永遠存在極大差異。男人會盡快忘記傷痛重新振作；女人會迴避痛楚唔願面對。咁唔代表女人軟弱，而係男人冇經歷過女人懷胎十月、生產同養育嘅過程，喪女嘅痛楚自然冇辦法理解。

所以劇入面，無論Edgar同Nancy幾咁深愛對方，但面對女兒逝世嘅落差，足以產生極大磨擦，世間幾多淪常慘劇就係因為咁而發生。

Edgar鍾意研究雀仔，就係因為「自由」。而潛意識中，佢正正因為冇辦法處理情緒，結果困喺悲傷嘅無限輪迴之中。

《The Murmuring》最恐怖地方，唔係Edgar幻想出嚟嘅古宅怨靈，而係兩夫婦隨時引爆嘅情緒炸彈，換來一發不可收拾嘅殘局。

霸戲哥好鍾意個結局，群雀穿過Edgar嘅孤單身影，一切傷痛頃刻釋懷，靈魂終於自由了。

霸戲哥

** 博客文章文責自負,不代表本公司立場 **

都市人生活緊張，個個直覺自己患有強迫症，好似冇強迫症嘅反而唔正常咁。霸戲哥每聽到有人話自己有強迫症，只會笑而不語，通常都唔會駁斥對方。因為霸戲哥知道，真正患強迫症嘅人，係唔會咁口輕輕咁同人講。

強迫症其實係焦慮症嘅一種，徵狀係不停重覆做出某些動作，以達到安心同減低焦慮嘅作用。霸戲哥以前有位hallmate，一緊張就會入廁所洗手，洗得啲手指爛溶溶，睇見都覺得陰公。

今晚J2《關注關注組》，十郎鄧梓峰同班J2ers就討論「強迫症」，都畀到唔少資訊大家。其中十郎向大家分享佢所學嘅筆跡學（Graphology），可以透過筆跡略略猜到一個人嘅性格。

筆跡學係遠古流傳嘅學說，起源要追溯至阿里士多德嘅年代。今日都有唔少用途，譬如用嚟查案、評估健康等等，有公司甚至會透過筆跡，去評估面試者適唔適合份工。

霸戲哥就肯定冇強迫症嘅，亦到唔會強迫自己臨瞓前一定要出post。不過反正都寫完囉，咪出埋佢囉，呵呵。