霸戲哥之日常#487｜ 宮城良田

距離《男兒當入樽》電影版上畫日子越嚟越近（12月3日喺日本上映），最新預告片亦啱啱流出。熟悉嘅面孔、球場嘅畫面、球鞋同地板嘅磨擦聲，再配上激昂配樂，已經令入樽迷如霸戲哥熱血沸騰同眼濕濕。

預告片最大驚喜，係重心唔再放喺櫻木同流川度，而係被嚴重underrated嘅宮城身上。開頭畫面，topshot見到有小孩跟哥哥打籃球，見佢做幾吓純屬嘅crossover同footwork再射籃炒粉，都會估到係童年版宮城。網民推斷呢個畫面係嚟自井上雄彥推出嘅短篇漫畫《耳環》嘅延伸，《耳環》公認係宮城前傳，講佢本來有個阿哥，有次出海釣魚後就音訊全無，亦有提及點解男人老狗會戴耳環，內含洋蔥，得閒可上網睇吓。

唔知電影版會唔會由宮城視角出發？定還是將每位登場角色補白，等觀眾知道點解佢哋咁熱血、咁唔服輸？諗起都有啲鼻酸。

咁多位入樽角色，霸戲哥其實最鍾意就係宮城，或者自己同對方嘅設定太似，都係生得矮、跑得快、射波唔準，同埋媾唔到女⋯⋯宮城看似冇乜建樹，但往往就係最關鍵時刻，都會挺身而出救全家。

真心希望電影版有多啲宮城嘅戲份。

霸戲哥

** 博客文章文責自負,不代表本公司立場 **

今晚英超大戰連場，頭場先有車路士對阿仙奴，10點有阿士東維拉對曼聯，凌晨再有熱刺對利物浦，球迷睇晒三場波直落，聽朝記得準時迎戰憂鬱星期一。

霸戲哥撐熱刺就梗嘅，但今仗主場對住排第9位嘅利物浦，都唔係咁樂觀。因為前線主力孫興文喺早前嘅歐聯賽事入面勇戰撞爆眼，依家要做手術，分分鐘連世界盃都踢唔到。連埋兩位主力古路錫斯基同李察利臣都要養傷，變相前線有級數嘅球員，就得番哈利簡尼一個，有啲孤立無援嘅感覺。

熱刺攻力唔夠，近排呢幾場波啲反擊死晒火，好在兩位中場比坦古亞同靴爾保分擔入球職務，先至勉強贏到波。但下下要靠中場殺上前入波，長遠都唔係辦法。至於熱刺嘅後防就更加慘不忍睹，對住般尼茅夫呢啲弱旅都要失兩球，睇怕今場對住利物浦都係捱打居多。

希望孫仔快啲好番啦。