霸戲哥之日常#489｜ 中年發夢

霸戲哥之前寫過話有舊同事C參加咗TVB搞嘅《中年好聲音》，相信大家都估到佢就係周吉佩。以吉吉嘅唱功，要喺3000人入面脫穎而出成功入圍，(given that 入面有屯門娜娜同時事評論員許禎），應該係冇乜難度。結果噚晚睇海選真係見到吉吉，豬視妹仲話佢瘦左半個碼，明顯為比賽減磅。

霸戲哥對吉吉呢位後生仔（但原來已經中年）特別欣賞，除咗佢本身做得嘢幫到手之外，亦同佢嘅成長背景同經歷有關。 又因為有呢啲經歷，令佢比其他同事成熟，好清楚自己嘅目標，做事亦特別認真同投入。

霸戲哥相信如果吉吉嘅運氣稍為好少少，唔使等到中年，一早就已經喺舞台上發光發亮。但，世事又邊有咁多如果。

就此祝福吉吉喺《中年好聲音》度過關斬將，搵返屬於自己嘅真正舞台。

霸戲哥

** 博客文章文責自負,不代表本公司立場 **

台慶劇《美麗戰場》噚晚大結局，算唔算圓滿真係好見仁見智，最後15分鐘劇情大暴走，朱晨麗失驚無神同姜大偉有路，又邊個傳條片畀方力申？方力申又去咗邊？臨尾反骨琪點解突然出現？仲同鍾家寶嗌聲家姐？相信連演員都睇到黑人問號。

葉念琛臨尾製造一大堆問號，擺明為續集鋪定路線，一貫MK活地阿倫嘅操作。不過傳統師奶未必太接受到。

但又咁講，邊個話大結局一定要解釋晒所有劇情先？又邊個話結局一定要合情理？成世人流流長，根本好多嘢都冇辦法搵到圓滿同合理嘅解釋。

葉念琛呢個操作成功引起好大迴響，有人已經出得post集思廣益，商量續集應該叫咩名。當然亦有新fb群組誕生，叫「葉念琛美麗戰場結局 導致葉伯母被瘋狂問候關注組」，搞到伯母好唔得閒。

留名等睇美麗殺戮戰場，反骨琪大戰黑化寶。