基仔指《一刻永恆》歌詞好有校園情懷,好適合仲係學生嘅Dark。
古巨基音樂企劃《I Really Love To Sing》第五首歌曲《一刻永恆》於11月8日正式上架。這次基仔請來同門小師弟、今年樂壇新人黃明德(Dark)齊齊合唱。
觀看相關影片按連結:https://youtu.be/URK68DKVg9U
基仔表示《一刻永恆》是自己特意揀選給Dark合唱,「呢首係我十五年前嘅作品,因為有啲歌詞好有嗰種校園情懷,好適合佢而家仲係學生嘅身份。譬如第一次食自助餐、第一次拍拖喺碼頭睇住隻船走咗,呢啲係好fit落阿Dark度,所以我係特別『點唱』㗎。」他又提到和Dark的「緣份」是源自公司舉辦的選秀比賽「冤枉新秀訓練營」總決賽,當時基仔擔任評判,「我仲記得當時同你講:『如果比賽完咗佢哋(英皇)冇簽到你,你可唔可以簽俾我呀?』所以我開呢個project嘅時候,就特別記起Dark,就邀請Dark一齊合作。」
受基仔邀請,Dark坦言受寵若驚,「以前我有busking開,好鍾意唱古Sir你嘅歌,但我當然要降key啦。我記得你搵我合作呢首歌嘅時候,我都仲未出道,仲未正式簽約做歌手,嗰陣真係好愕然。」他又謂基仔選這首歌,與他猶如學長學弟,「好似一齊傾番以前初戀,或者係成長嘅經歷,好似一種對話對答咁樣。」
在錄音過程中,基仔的指導亦令Dark有所得着,Dark表示:「整個錄音過程令我學識點樣可以想像一啲情境去講故事,因為我參加歌唱比賽嘅時候我係唱英文歌,古Sir睇到我唱廣東歌上嘅問題,就幫我慢慢去改進。」基仔則大讚Dark進步很快,「我同佢分享咗點樣用聲音去做表情,即係所謂演繹嘅手法。其實阿Dark個底子好好,改善少少啲咬字同埋啲語氣就好好。」