「泡泡人」免疫系統失效 死前首次接觸父母

有時一個擁抱或者搭搭膀頭，不需一句話就能鼓勵人心。大家又知唔知，原來有啲人因為疾病，天生就唔能夠與人接觸，無法感受他人掌心傳嚟嘅溫暖呢？美國幾十年前有個著名「泡泡人」，因為身患奇症，免疲系統完全失效，自出生開始就要活在一個特製泡泡內。直到佢臨死前一刻，父母先可以首次撫摸自己親生仔。

David Vetter喺1971年9月出世，一落地就俾人安放喺個無菌泡泡內，因為佢患有「嚴重複合性免疫缺陷症」，任何細菌都有能力殺死佢。本來家人期望姐姐捐獻骨髓可以幫佢重新建立免疫系統，但醫生檢查發現兩者血型無法配對，意味佢終生要同外界隔離。

美國太空總署為咗研究呢個怪病，全力協助David Vetter建立無菌環境。除咗「泡泡衫」，仲打造咗間「泡泡屋」，內裏物品全部經過無菌處理。佢會喺屋內學習、睇電視、玩玩具，可惜永遠只能自己一個人生活。望出窗外見到其他人可以一齊玩、吵吵鬧鬧時，小朋友難免感到不快。

就喺佢12歲時，幾名波士頓科學家話研究到新方法令姐姐骨髓安全移植到佢身上。無奈手術結束幾日後，David Vetter開始嘔吐，無幾耐陷入昏迷，幾小時後證實不治。直到佢去世前一刻，父母先可以摸一下自己寶貝仔。阿仔輕輕一笑，首次感到別人體溫後就離開人世。

好多人都責怪科學家安排佢接受骨髓移植，但係驗屍報告就表明，佢係死於姐姐骨髓一種病毒，誘發身體出現一種罕見癌症。呢位「泡泡人」嘅個案，為研究員提供唔少資料，如今超過九成嚴重複合性免疫缺陷症患者都可以成功康復。

神州快訊

** 博客文章文責自負,不代表本公司立場 **

最近有兩本書因為內容很黃很暴力，出版商被迫收返，令人關注書籍出版審查制度。其實嗰兩本書提到嘅網絡資訊發布同樣值得大家關注，就好似書中提到久不久有人會將Deep Web恐怖內容放到「面網絡」。呢個時候一班勞苦工高嘅「內容過濾員」就要出動刪走色情同暴力內容，還大家一乾淨嘅網絡環境。慘就慘在呢班人薪金低之餘，仲因為經常接觸變態資訊心理受創。

美國《Wired》雜誌2014年10月有專題報道過呢個行業。原來全球有約10萬人從事「內容過濾員」，專喺社交網站、影音分享平台等審查資訊。佢哋每日緊貼追蹤最新上傳內容，一發現限制級內容就刪除。行業興起之初主要由美國大學生同「新鮮人」負責，之後慢慢外判到菲律賓等東南亞國家，從業員日薪只有大約20美元，折合155港元。

呢份工聽落好似好輕鬆，實情嚴重影響身心健康。大部份人做咗三至六個月後，就會頂唔順啲恐怖內容離職。唔少美國科技公司都有聘請心理醫生審視員工情況，但係東南亞國家嘅公司就無咁好福利啦。

報道引述前YouTube「內容過濾員」Rob話每日都要接觸大量殺人、虐待動物、恐怖襲擊等影像，收工後畫面仍然揮之不去，搞到佢成日飲酒紓壓。佢仲話見到好多人虐待完動物竟然會覺得自豪，令佢對人性失去信心，做咗一年就辭職。

另一名苦主係Jake Swearingen，曾經幫VideoEgg過濾內容。佢話頭兩日返工啲內容仲算正常，但到第三日佢見到一段斬首影片，嚇到講晒粗口，但係身邊同事見怪不怪咁，令佢決定辭職，唔想自己都變到咁冷血。

呢個情況喺菲律賓更差。記者喺馬尼拉遇到Maria，知道佢同好多女同事最接受唔到嘅就係性侵孩童影片，因此唔敢將小朋友交俾其他人照顧。佢話好耐好耐之前睇過一段中東光頭男性侵未成年少女影片，縈繞於心：「我不知道忘不忘得了。我很久前看的，感覺卻像昨天。」

以後見到facebook版面「乾淨企理」，唔好唔記得全靠背後有班內容過濾員係承受緊心理創傷，要多謝佢哋貢獻啊！

詳細報道如下：
http://www.wired.com/2014/10/content-moderation/#slide-x